Read Pashto Bible (Yusufzai) — د پښتو مقدس کتاب زبور 25 Bible Online

زبور 25 - Pashto Bible (Yusufzai) — د پښتو مقدس کتاب bible

زبور 25

¹زما مالِکه خُدایه، زهٔ دعا غواړم له تا،

²اے زما پاکه خُدايه، زۀ توکل کوم په تا. ما شرمنده کيدو نه بچ کړه، مه پریږده چې دشمنان کامیاب شی په ما.

³هیڅکله شرمنده به نهٔ شی هغه څوک چې کوی یقین په تا، خو شرمیږى به هغوئ چې د نورو سره کوی دوکه.

⁴اے مالِکه خُدايه، ما ته خپلې لارې وښايه، خپلې لارې راته وښايه چې زۀ په هغې لاړ شم.

⁵تهٔ ما د خپل حقیقت خوا له بوځه او هم درس راکړه ما له، او هر وخت زهٔ توکل کوم په تا اے زما خلاصُونکى خُدايه.

⁶اے مالِکه خُدايه هغه مینه او رحم دې در په یاد کړه خپله، چې کوله دې د ازله تا په خپله.

⁷زما د ځوانئ غلطئ او ګناه مه يادوه خو ما د خپلې بې بها مينې په وجه یادوه، ځکه چې تهٔ مهربان يې اے مالِکه خُدايه.

⁸ښۀ مې مالِک خُدائ دے سم کارونه کوی، څوک چې وى بې لارې هغوئ ته نېغه لار سموی.

⁹هغه عاجزان په سمه لار راوانوی، او خپله لار هغوئ ته ور زده کوی.

¹⁰د مالِک خُدائ ټولې لارې دی ډکې د وفا او د مينې، د هغه چا دپاره چې ساتى د هغهٔ د تړون ټولې غوښتنې.

¹¹اے مالِکه خُدايه، د خپل پاک نوم د خاطره، راوبخښه کۀ هر څومره زما ګناه ده لویه.

¹²څوک دی هغوئ چې د مالِک خُدائ نه یره کوی؟ هغه به دوئ ته هغه لار وښائی کومه چې دوئ دپاره غوره کول دى.

¹³هغوئ به خپل ژوند په خیر تیروی، د هغۀ اولاد ته به زمکه په ميراث کښې ورکوی.

¹⁴مالِک خُدائ د هغه چا ملګرے دے څوک چې د هغهٔ نه يرېږی، هغوئ ته به د خپل تړون شرطونه ورزده کوی.

¹⁵زما نظر به همیشه د مالِک خُدائ طرف ته وی، هم هغه ما د دشمنانو د دام نه خلاصوی.

¹⁶او خپل فضل په ما وکړه زما طرف ته راوګرځه، ځکه زهٔ یواځې شوے یم بد حاله.

¹⁷د بد نه بدتر شول زما غمونه، خلاص مې کړه تکلیفونه.

¹⁸زما غمونو او مصیبتونو ته توجه ورکړه او زما ټول ګناهونه ما ته معاف کړه.

¹⁹ګوره څومره ډيریږی دشمنان زما ګوره چې دوئ څومره کرکه کوى له ما.

²⁰زما ژوند د دوئ نه په امان کړه ما وساته، ما مه شرموه چې راوړی مې ده پناه تا ته.

²¹زما راستې زما نېکې دې پام وکړى په ما، ځکه چې په تا توکل کړے دے ما.

²²اے پاکه خُدايه، بنی اِسرائيل بچ کړه، د ټولو مشکلاتو نه يې خلاص کړه.