Read Pashto Bible (Yusufzai) — د پښتو مقدس کتاب زبور 26 Bible Online

زبور 26 - Pashto Bible (Yusufzai) — د پښتو مقدس کتاب bible

زبور 26

¹اے مالِکه خُدایه، زما د بې ګناهئ په حقله تاسو فیصله وکړئ، ځکه چې ما همیشه نیکی کړې ده، ما په مالِک خُدائ بې شکه باور کړے دے.

²اے مالِکه خُدايه په ما باندې آزمېښت وکړه او کره مې کړه، زما د زړۀ او خیالونو آزميښت وکړه.

³خو زهٔ ستا د بې شانه مينې نه همیشه خبر یم، نو ځکه زۀ ستا د حقیقت په مطابق ژوند تیروم.

⁴زۀ د دروغجنو خلقو سره نهٔ کښینم، نۀ د منافقانو سره په لاره ځم،

⁵د بدعملو د محفل نه زهٔ نفرت کوم او نۀ زۀ د شريرانو دوستی کوم.

⁶زۀ خپل لاسونه د ګناه نه وينځم، اے مالِکه خُدایه، نو ستا قربان ګاه نه به طواف کوم.

⁷زۀ به د شکرانې سندرې وایم او ستا ټول عجيبه کارونه به وایم.

⁸زهٔ مینه کوم مالِکه خُدایه ستا مقدس کور سره، چرته چې ستا جلالی حضُور اوسېږى هغه ځای سره.

⁹ما د ګناهګارانو سره مۀ حسابوه، ما د قاتلانو سره مه مجرم کوه.

¹⁰په ناپاکه منصُوبو د هغوئ لاسونه سخا دی، د رشوت نه ډک هر وخت د هغوئ لاسونه دی.

¹¹خو زۀ داسې نهٔ یم، زۀ په دنيا کښې پاک اوسیږم، په ما شه مِهربانه او ما بچ کړه.

¹²زۀ اوس په هوار میدان ولاړ یم، زۀ به د ټول جماعت په وړاندې د مالِک خُدائ ثناء صِفت وایم.