Read Pashto Bible (Yusufzai) — د پښتو مقدس کتاب زبور 27 Bible Online

زبور 27 - Pashto Bible (Yusufzai) — د پښتو مقدس کتاب bible

زبور 27

¹مالِک خُدائ دے زما خلاصُون او زما رڼا نو بیا زۀ ولې یره وکړم د چا؟ او مالِک خُدائ دے زما د ژوند قلعه نو بیا به زهٔ ولې یره وکړم د چا؟

²چې کله ما ختمول غواړى بدکاران او حمله راباندى وکړی زما دشمنان، تيندک به وخورى او راګزار به شى زما دشمنان.

³هر څو کۀ رانه تاو شی ګيرچاپيره لښکرې، زړۀ کښې یره نۀ لرم. کۀ شروع شی زما خلاف جنګونه، خو زۀ به خاطر جمع يم.

⁴د مالِک خُدائ نه هغه څۀ چې زۀ یې لټوم، ما یو سوال وکړو: چې په کور د مالِک خُدائ کښې ټول عمر اوسیږم، او چې هغه په خپل کور کښې ولټوم چې د هغهٔ د حُسن ديدن وکړم.

⁵خو په سخته ورځ به هغه ما له په خپل مقدس کور کښې پناه راکړی، او په خپله خیمه کښې به هغه ما له حفاظت راکړی او ما به هغه پاس په لوړه د ګټ دپاسه کښېنوی.

⁶نو بیا به زهٔ خپله غړئ هسکه کړم د هغوئ په وړاندې چا چې راګیر کړے یم، د هغۀ مقدس کور کښې به د خوشحالئ په چغو قربانى وکړم، زۀ به سندرې او سرود او ثناء صفت د مالِک خُدائ ووایم.

⁷اے مالِکه خُدايه زما فرياد اوره کله چې زۀ سوال زارى کوم، مهربان شه، زما سوالونه قبول کړه.

⁸کله چې تا ووئيل، ”راشه زما ديدن وکړه،“ نو ما وئيل، ”اے مالِکه خُدايه، زۀ به درشم.“

⁹خپل مخ رانه مۀ اړوه ما ته مۀ په قهر کېږه تهٔ، خپل خدمتګار دې غصه کښې مۀ پرېږده تۀ، اے پاکه خُدايه، اوس ما مه پریږده او ما مه ردکوه زما خلاصُونکے يې تهٔ.

¹⁰کۀ څهٔ هم چې مور او پلار ما ځان له پریږدی، خو مالِک خُدائ به ما خپل ځان ته نزدې کړی.

¹¹اے مالِکه خُدايه، ما ته خپله لار راوښايه، ځکه چې دشمن زما په انتظار کښې دے نو په نېغه لار مې بوځه.

¹²ما د دشمنانو لاسونو ته مه پریږده، ځکه چې دوئ په ما هغه تهمت لګوی کوم چې ما کړے نهٔ وی، هره لحظه او شیبه کښې د شرارت دهمکی راکوی.

¹³زما يقين دے د مالِک خُدائ مهربانى به ووينم، ترڅو چې زۀ دلته په دې دنيا کښې يم.

¹⁴نو مالِک خُدائ ته په صبر او انتظار شه، نو ډاډه شه او زړۀ ور شه او، د مالِک خُدائ په صبر او انتظار شه.