Read Pashto Bible (Yusufzai) — د پښتو مقدس کتاب زبور 28 Bible Online

زبور 28 - Pashto Bible (Yusufzai) — د پښتو مقدس کتاب bible

زبور 28

¹زۀ تا ته زارى کومه، اے مالِکه خُدايه زما حفاظت کوونکیه، خپل غوږونه دې په ما مه کڼوه. کۀ چرې تۀ پاتې شوې خاموشه، زۀ به هم د هغه چا په شان شم چې روان وی قبرستان ته.

²زما دعا واوره او په ما رحم وکړه کله چې زۀ تا ته د مدد دپاره فرياد وکړم، چې کله هم زهٔ خپل لاسونه ستا مقدس مقام په لورې پورته کړم.

³ما لری مۀ غورزوه د بد کارانو سره، او څوک چې بد کوی کارونه د هغوئ سره، څوک چې کوى په خولهٔ خوږې خبرې ګاونډیانو سره خو په زړۀ کښې جوړوی منصُوبې د فسادونو سره.

⁴هغوئ ته د هغوئ د عملونو سزا ورکړه هغوئ ته د هغوئ د بدو کارونو په اندازه بدله ورکړه، هغوئ ته د خپلو بدو عملونو او کارونو بدله ورکړه کوم ‎چې دوئ د نورو سره کړی دی هغوئ ته د هغه څهٔ سزا ورکړه.

⁵ځکه چې هغوئ د مالِک خُدائ د کارونو نه بې پرواه دی او د هغۀ د لاسونو کړې کارونه نۀ وينی، هغه به هغوئ ښکته راګزار کړی، او هيڅ کله به بيا آباد نۀ شی.

⁶ثناء صِفت دې مالِک خُدائ ته وی، ځکه چې د رحم دپاره هغۀ زما ژړا واوریدله.

⁷مالِک خُدائ زما قوت دے زما ډال دے، زما په هغهٔ د خپل ټول زړهٔ سره يقين دے، هغهٔ ما سره مدد وکړو، او زړۀ مې خوشحاله دے، زهٔ به د ثناء صفت سندرو سره د هغهٔ شکريه ادا کړم.

⁸مالِک خُدائ خپلو خلقو له طاقت ورکوی، هغۀ د خپل مسح شوى بادشاه يوه محفوظه قلعه وی.

⁹بچ کړه خپل خاص خلق او ورته برکت ورکړه، شپون د هغوئ جوړ شه همیشه يې په خپلو لاسونو کښې اوچت کړه.