Read Pashto Bible (Yusufzai) — د پښتو مقدس کتاب زبور 29 Bible Online

زبور 29 - Pashto Bible (Yusufzai) — د پښتو مقدس کتاب bible

زبور 29

¹اے د آسمان مخلوقه، د مالِک خُدائ ثناء صفت وکړئ، د مالِک خُدائ د جلال او د طاقت ثناء صفت وکړئ.

²د مالِک خُدائ د جلالى نوم ثناء صفت وکړئ، د مالِک خُدائ عبادت د هغهٔ د مقدس شان په مطابق وکړئ.

³آواز د مالِک خُدائ د دریابونو دپاسه اوريدے شی، د تندر په شان، د زورَورو اوبو دپاسه د جلالی خُدائ آواز اوريدے شى د تندر په شان.

⁴آواز د مالِک خُدائ ډېر زورَور دے، د مالِک خُدائ د آواز لوئ شان دے.

⁵د مالِک خُدائ آواز د زورَور دیار ونې ماتوی، د مالِک خُدائ آواز د لبنان د ديار ونې ماتوی.

⁶هغه د لبنان غرونه په ټوپونو کوى د سخی په شان، هغه د حرمون غر په ټوپونو کوى لکه د ځوان ځنګلی غویې په شان.

⁷د مالِک خُدائ آواز شعله کوى لکه د بریښنا په شان.

⁸د مالِک خُدائ آواز صحراګانې لړزوی، د مالِک خُدائ آواز د قادِش دشته ښوزوی.

⁹د مالِک خُدائ آواز د څیړ‎ئ ونې کږوی او د ځنګلی ونو پاڼې رژوی، د هغهٔ په کور کښې هر یو چغې وهى چې، ”خُدائ لوئ ‎‎دے.“

¹⁰مالِک خُدائ په سېلاب باندې هم خپل حکومت کوی، مالِک خُدائ د تل دپاره بادشاهى کوی.

¹¹طاقت ورکوى خپلو خلقو ته په خپله مالِک خُدائ، د امن او امان برکت ورکوى خپلو خلقو ته په خپله مالِک خُدائ.