Read Pashto Bible (Yusufzai) — د پښتو مقدس کتاب زبور 30 Bible Online

زبور 30 - Pashto Bible (Yusufzai) — د پښتو مقدس کتاب bible

زبور 30

¹اے مالِکه خُدايه ستا ثناء صفت بيانوم، ځکه چې تا زهٔ بچ کړم، زهٔ دې د دشمنانو د مسخرو نهٔ کړم.

²اے مالِکه زما خُدايه، ما مدد دپاره تا ته زارى وکړله او تا ما ته شفا راکړله.

³اے مالِکه خُدایه تا زهٔ د قبر نه راوویستم، تا زهٔ د مرګ کندې ته د غورزيدو نه بچ کړم.

⁴اے ایماندارانو مالِک خُدائ ته سندرې ووايئ، د هغۀ د مقدس نوم ثناء صفت ادا کړئ.

⁵ځکه چې د هغهٔ غضب یوه لحظه وی، خو د هغهٔ فضل د ټول عمر وی، ژړا صرف د شپې وی، خو سحر کښې بیا خوشحالی وی.

⁶کله چې زهٔ ښهٔ وومه نو ما داسې و‎ئیل، ”زهٔ به هیڅکله په لړزان نهٔ شم.“

⁷اے مالِکه خُدايه، لکه غر په شان ستا فضل زهٔ قوی کړم، چې مخ دې رانه واړولو نو زۀ شومه مایوسه او حیران.

⁸اے مالِکه خُدايه، ما تا ته ژړا او فرياد وکړو ما مالِک ته د رحم سوال وکړو او ومې وئیل،

⁹”تا ته څهٔ فايده ده چې زهٔ مړ شم، او ګور ته لاړ شم؟ زما خاورې ستا ثناء صفت کولے شى څهٔ؟ دا ستا وفاداری بیانولے شى څهٔ؟

¹⁰اے مالِکه خُدايه، رحم په ما وکړه سوال مې واوره، اے مالِکه خُدایه، زما مدد ګار شه.“

¹¹تا زما ویر د خوشحالئ په ګډا باندې بدل کړو، تا رانه د غم جامې کوزې کړې او د خوشحالئ لباس دې راکړو،

¹²نو ستا ثناء صِفت به کوم او خاموش به نهٔ شم. اے مالِکه خُدايه، زما پاکه خُدايه، زهٔ به د ټول عمر دپاره ستا شکريه ادا کړم.