Read Pashto Bible (Yusufzai) — د پښتو مقدس کتاب زبور 31 Bible Online

زبور 31 - Pashto Bible (Yusufzai) — د پښتو مقدس کتاب bible

زبور 31

¹اے مالِکه خُدايه، زۀ تا له د پناه دپاره راغلے یم، ما بچ کړه چې زهٔ ونهٔ شرميږم. په خپل عدالت کښې دې ما له خلاصُون راکړه.

²خپل غوږ دې ما ته راواړَوه زر راشه او خلاصُون راکړه ما له، زما د بچ کولو ګټ او مضبوطه قلعه جوړه شه چې په کوم کښې به امان راکوی ما له.

³تۀ زما ګټ او زما قلعه يې. د خپل نوم د خاطره دې زما لارښوونه وکړه،

⁴ما د هغه دام نه آزاد کړه چې کوم یې په پټه خور کړے دے، ځکه چې تهٔ زما د پناه ځائ یې.

⁵زهٔ ستا لاسونو ته خپل روح سپارم، مالِکه خُدایه تهٔ وفادار خُدائ يې تا زهٔ بچ کړم.

⁶څوک چې د بې‌کاره بُتانو عبادت کوى د هغوئ نه زما نفرت دے. اے مالِکه خُدايه په تا باندې زما يقين دے.

⁷زۀ به ستا ابدى مينه کښې خندا او خوشحالى کوم، ځکه چې تا په تکليفُونو کښې ولیدم، او تۀ زما د زړهٔ په مشکلاتو کوې پام.

⁸زۀ دې د دشمن لاسونو ته ورنۀ کړم پراخه میدان ته دې زهٔ بوتلم.

⁹اے مالِکه خُدايه په ما مهربان شه په سختۍ کښې یم، د غم په وجه د سترګو نظر مې لاړو ړوند شوم، په بدن او روح کمزورے شوم.

¹⁰ژوند مې په غم تیر شو، د خفګان سره مې عمر لنډ شو، ګناهونو مې زور ختم کړے دے، او هډُوکی مې کمزورى شول.

¹¹دشمنان او ګاونډیان ټول راته په سپکه سترګه ګوری، تر دې چې دوستان هم ما ته د نزدې راتلو نه یریږى. کله چې ما کوڅو کښې ووينی، دوئ بل طرف ته ځغلی.

¹²لکه مړے چې څوک هېر کړى داسې هېر شوم، زهٔ لکه د یو مات لوښې په شان جوړ شوم.

¹³د ځان په حقله ما د ډيرو افواګانې واوريدلې، او د هرې خوا نه په یرو کښې راګير شوم. زما د ختمولو منصُوبې دشمن جوړې کړې.

¹⁴خو اے مالِکه خُدايه په تا دے يقين زما، وايمه چې، ”هم تۀ خُدائ يې زما.“

¹⁵ستا په لاسونو کښې دے مستقبل زما، د دشمنانو نه مې بچ کړه څوک چې ظُلم کوی په ما.

¹⁶خپله د مخ رڼا دې په خپل خدمتګار وځلوه. په خپله نهٔ ختمېدونکې مينې سره دې ما بچ کړه.

¹⁷چې زهٔ ونۀ شرميږمه اے مالِکه خُدايه، خو د مدد دپاره زۀ تا ته فرياد کوم. بد عمله دې شرمنده شی، هغوئ دې په لحد کښې غلې شی.

¹⁸د هغوئ دروغجنې ژبې دې غلې شی هغه مغرورې ژبې چې نېکانو پسې سپکې وائی.

¹⁹ستا احسان څومره لوئ وی چې تا ساتلی د هغه چا دپاره څوک چې تا نه یریږی. هر هغه چا ته يې زیات ورکوې څوک چې تا ته د پناه دپاره راځی، او د ټولو خلقو په وړاندې هغوئ ته برکت ورکوې.

²⁰د خپل حضُور د سورې لاندې تۀ هغوئ ته پناه ورکوې، تهٔ هغوئ د خلقو د پټو منصُوبو نه بچ ساتې، او په خپل حضُور کښې د خلقو د سپکو خبرو نه ورته پناه ورکوې.

²¹د مالِک خُدائ ثناء دې وی، هغۀ ما ته خپله خاص مینه وښودله کله چې زهٔ ګیر شوى ښار کښې محاصره وم.

²²نو د يرې نه ما چغه کړه چې، ”زهٔ د مالِک نظر نه غورزیدلے یم.“ خو تا زما واوريدل کله چې زهٔ د مدد دپاره ژړيدلے یم.

²³اے ټولو ايماندارو د مالِک خُدائ سره مينه کوئ، مالِک خُدائ خپل وفادار بچ کوی، او د کبرژنو نه پوره بدله اخلی.

²⁴نو تاسو زړَور او تکړه اوسئ، اے ټولو څوک چې د مالِک خُدائ نه اُميد لرئ.