Read Pashto Bible (Yusufzai) — د پښتو مقدس کتاب زبور 32 Bible Online

زبور 32 - Pashto Bible (Yusufzai) — د پښتو مقدس کتاب bible

زبور 32

¹بختور دی هغوئ د چا نافرمانى چې معاف شی، او د چا په ګناهونو چې پرده واچولے شی.

²نو څومره بختور هغه کس دے د چا بد چې مالِک خُدائ حساب نهٔ کړی او څوک چې په خپل ژوند کښې ټګى نۀ کړی.

³خو چې کله ما خپله ګناه پټوله، نو زما بدن کمزورے کیدلو او ټوله ورځ هډوکو به مې درد کولو.

⁴هر کله چې شپه او ورځ ستا د اصلاح دروند لاس په سر وو زما، لکه په سختې ګرمئ کښې زور شو ختم زما.

⁵نو آخر هم ما د خپلې ګناه اقرار وکړو تا ته خو ما پټې نهٔ کړې خپلې خطاګانې له تا نه. نو ما ووئيل خپل ځان سره چې، ”خپله سرکشى به مالِک خُدائ ته بيان کړم.“ نو بیا تا زما د ګناهونو خطا معاف کړه.

⁶نو د دې دپاره هر څوک چې نېکان وی هغوئ دې هم دا اوس دعا وغواړى له تا نه، بې شکه دوئ ته به ونهٔ رسیږی تکلیفونه کۀ هم راشی لوئ سیلابونه.

⁷تۀ زما پناه ګاه یې او د تکلیفونو نه دې بچ کړم، او زهٔ دې د کامیابئ په نغمو کښې تاو کړم.

⁸مالِک خُدائ وائی، زۀ به تا ته ښۀ او نېغه لار ستا د ژوند دپاره دروښايم. زهٔ به تا ته نصيحت کوم او په تا به نظر ساتم.

⁹د مست آس يا قچر په شان مه جوړيږئ چې د واګو او قیضې نه غیر نهٔ قابو کیږی.

¹⁰بدکارانو او شريرانو له غمونه ډېر وی، خو د چا چې په هغهٔ باندې توکل وی د مالِک خُدائ مينه د هغۀ نه ګیرچاپیره وی.

¹¹نو په مالِک خُدائ کښې خوشحاله اوسئ، تاسو ټول چې د هغهٔ تابعدار يئ، د خوشحالئ چغې ووهئ، تاسو د چا زړونه چې صفا دی.