Read Pashto Bible (Yusufzai) — د پښتو مقدس کتاب زبور 33 Bible Online

زبور 33 - Pashto Bible (Yusufzai) — د پښتو مقدس کتاب bible

زبور 33

¹اے صادِقانو، مالِک خُدائ ته د خوشحالئ سندرې ووايئ، دا د صادِقانو دپاره ښهٔ دی چې د هغهٔ ثناء ووایى.

²د بينجو د ساز سره د مالِک خُدائ ثناء خوان شئ، د رباب په لسو تارو ساز کښې د هغهٔ ثناء خوان شئ.

³په نوې حمد د هغۀ ثناء صِفت ادا کړئ، په حکمت سره رباب ووهئ، او د خوشحالئ دپاره چغې ووهئ.

⁴د مالِک خُدائ کلام رښتونے دے، څهٔ چې هغه کوی ټول د اطمینان دی.

⁵مالِک خُدائ د صداقت او اِنصاف سره مینه کوی، د هغۀ په ازلى مينې ټوله زمکه ډکه ده.

⁶د مالِک خُدائ په کلام سره جوړ شوى آسمانونه دی، د هغهٔ د خولې په کلام نمر، سپوږمۍ او ټول ستورى جوړ شوی دی.

⁷هغۀ د سمندر اوبۀ په يو ځائ جمع کړی دی، هغهٔ د سمندر اوبۀ په ذخیرو کښې بندې کړی دی.

⁸د مالِک خُدائ نه دې ټوله دنيا یره وکړی، د زمکې هر کس دې د هغۀ احترام وکړی.

⁹نو چې هغهٔ وفرمائيل، دنيا پيدا شوه، د هغۀ په حُکم ژوند پيدا شو.

¹⁰مالِک خُدائ د قومونو منصُوبې بې نتيجې کوی، هغه د هغوئ ټولې منصُوبې باطلوی.

¹¹خو د مالِک خُدائ منصُوبې به د تل دپاره قائمې شی، او د هغهٔ ارادې به هیڅکله ښوزولے نهٔ شی.

¹²څومره بختور دے هغه قوم د چا خُدائ چې مالِک خُدائ وی، او د خپل میراث دپاره چې هغهٔ غوره کړی وی.

¹³د آسمان نه مالِک خُدائ لاندې ګورى او هغه ټول بنيادمان وينى،

¹⁴د خپل تخت نه هغه کتل کوى ټول خلق وینى کوم چې په زمکه اوسيدل کوى.

¹⁵هغه د ټولو د زړونو جوړونکے دے، نو د هغوئ په هر عمل هغه خبر دے.

¹⁶یو بادشاه به هم د خپل لښکر په ډیروالی بچ نهٔ شی، او نۀ به کوم تکړه سپاهی په خپل زور تښتيدے شی.

¹⁷د خلاصُون دپاره جنګی اَس بې فائدې شی، هغه په خپل ټول زور بیا هم تا بچ کولے نهٔ شی.

¹⁸مالِک خُدائ په هغوئ نظر ساتی څوک چې د هغهٔ نه يریږی، په هغوئ باندې چې د هغۀ په ازلى مينه اُميد ساتی،

¹⁹هغه دوئ د مرګ نه بچ ساتی او د قحط په وخت کښې يې ژوندى ساتی.

²⁰مونږ په مالِک خُدائ باندې توکل کوُو، هغه زمونږ مدد او زمونږ ډال دے.

²¹په هغهٔ کښې زمونږ زړونه خوشحاله دی، او د هغهٔ په پاک نوم زمونږ ايمان دے.

²²مالِکه خُدایه، ستا ابدى مينه دې مونږ سره وی. لکه څنګه چې له تا نه زمونږ اُميد وی.