Read Pashto Bible (Yusufzai) — د پښتو مقدس کتاب زبور 34 Bible Online

زبور 34 - Pashto Bible (Yusufzai) — د پښتو مقدس کتاب bible

زبور 34

¹هر وخت به زۀ د مالِک خُدائ ثناء صفت کوم، زهٔ به په خپله ژبه ټول عمر د هغۀ ثناء صِفت کوم.

²په مالِک خُدائ به زما روح فخر کوی، بې وسه خلق دې خوشحالی کوی.

³راځئ زما سره د خُدائ لوئې بيان کړئ، او په شريکه د هغۀ نوم ته لوئې ورکړئ.

⁴نو هغه ما ته جواب راکوی کله چې زهٔ د مالِک خُدائ نه سوال کوم، زهٔ يې د خپلې هرې یرې نه خلاص کړم.

⁵څوک چې په هغۀ توکل کوى نو د خوشحالئ نه ځلیږی، مخ تورن به نهٔ وی او نۀ به شرمیږى.

⁶مالِک خُدائ زما عاجز دعا واوریدله، د خپلو ټولو تکلیفونو نه هغهٔ زهٔ خلاص کړم.

⁷د مالِک خُدائ فرښتې د هغه خلقو نه ګېرچاپېره وی، بچ ساتى هغوئ څوک چې د مالِک خُدائ نه په ویره وی.

⁸د مالِک خُدائ ښهٔ والے وآزمايئ او وګورئ چې هغه څومره ښهٔ دے. څوک چې د هغهٔ نه پناه غواړى هغه بختور دے،

⁹اے ټولو پاکانو د مالِک خُدائ نه یره کوئ، د هغوئ به د هیڅ څیز کمے نۀ وى څوک چې ترې نه یره کوی.

¹⁰د زمری بچى به اوږی او کمزورى شی، خو د چا چې په مالِک خُدائ باندې توکل وی هغه به د هیڅ څیز محتاجه نهٔ شی،

¹¹راځئ، زما بچو، ما ته غوږ شئ، نو تاسو به د خُدائ د یرې نه خبر کړم.

¹²په تاسو کښې څوک داسې شته چې ډیر اوږد عمر غواړى ښې او نيک بختې ورځې ليدل غواړى،

¹³نو په خپلې ژبې سره بد مه وايئ او په خپلو شونډو سره دروغ مه وایئ.

¹⁴ښۀ کوئ او د بدو نه ځان ساتئ، امن قائم ساتئ او د هغې کوشش کوئ.

¹⁵د مالِک خُدائ نظر په صادِقانو وی او د هغوئ فريادونه اوری.

¹⁶خو مالِک خُدائ د هغوئ په خلاف وی څوک چې بد کارونه کوی، او د هغوئ نام و نشان د زمکې د مخ نه ورَکَوی.

¹⁷نو مالِک خُدائ يې اورى کله چې صادِقان فرياد کوی، او د ټولو مصیبتونو نه ورته خلاصُون ورکوی.

¹⁸مالِک خُدائ هغه چا ته ورنزدې دے څوک چې غمژن وی او هغوئ ته خلاصُون ورکوی څوک چې بې حوصلې وی.

¹⁹که هر څو يو صادِق اِنسان د مصیبتونو سره مخ شی، خو مالِک خُدائ د هغه ټولو نه هغهٔ ته خلاصُون ورکوی.

²⁰نو مالِک خُدائ د هغهٔ د ټولو اندامونو حفاظت کوی، چې کله به د هغوئ نه يو هم مات نهٔ شی.

²¹بد عمله به په خپله بدکارئ ټول تباه شی، او د صادِقانو دشمن ته به سزا ورکړے شی.

²²خو مالِک خُدائ به خپلو خادمانو ته خلاصُون ورکوی، هیڅ یو به هم مجرم نهٔ شی څوک چې د هغهٔ نه پناه غواړى.