Read Pashto Bible (Yusufzai) — د پښتو مقدس کتاب زبور 37 Bible Online

زبور 37 - Pashto Bible (Yusufzai) — د پښتو مقدس کتاب bible

زبور 37

¹د بدکارانو په حقله ځان مه پریشانوه، او د ګناه ګارانو کارونو ته نيت مه بدوه.

²ځکه دوئ به اوچ شی د وښو په شان، او شى به مړاوی د بوټو شنو په شان.

³په مالِک خُدائ توکل وکړه او نيکى کوه، نو په زمکه باندې په امن سره ژوندون کوه.

⁴په مالِک خُدائ کښې خوشحاله اوسه، نو هغه به پوره کړى ستا د زړهٔ آرمانونه.

⁵هر څهٔ چې تهٔ کوې هغه خپل مالِک خُدائ ته وسپاره، په هغۀ يقين لره هغه به شی ستا مددګاره.

⁶هغه به ستا رښتینوالے لکه د سحر هسې روښانه کړى، او ستا سره اِنصاف به لکه د غرمې د نمر هسې روښانه کړى.

⁷د مالِک خُدائ په وړاندې چپ ودریږه، او په صبر سره د هغهٔ فیصلو ته انتظار کوه، او د بدکارانو په کامیابئ او منصُوبو مۀ خفه کيږه.

⁸تهٔ قهر او غصه مۀ کوه او مه خفه کیږه، دا به صرف تا د نقصان په طرف پریږدی.

⁹ځکه چې تباه به شی بدکاران، څوک چې په مالِک خُدائ لری ایمان، دوئ به شی ضرور د زمکې وارثان.

¹⁰په لږ وخت کښې به فنا شی بد کاران، تاسو به يې لټون کوئ خو پیدا به نهٔ شی بدکاران.

¹¹د زمکې وارثان به جوړ شی عاجزان، په خوشحالئ سره به اوسیږى په امان.

¹²بدکاران د صادِقانو خلاف منصُوبې جوړوی او د غصې نه ورته خپل غاښونه چيچى.

¹³مالِک خُدائ شريرانو پورې خاندى، ځکه چې هغه د دوئ د قضا ورځ وینى.

¹⁴راکاږى ليندې، خپله توره راوباسى بدکاران، تر څو چې پرې مړهٔ کړى غریبان او مظلومان، او چې مړهٔ کړی هغوئ څوک دی صادِقان.

¹⁵خو په خپلو تورو به سورې شی د هم دوئ زړونه او د دوئ ليندې به ماتې شینه

¹⁶د یو صادِق چې لږ مال او دولت وی، د بد عملو د ډېر دولت نه به قيمتی وی.

¹⁷او مالِک خُدائ به د بدعملو زور ختم کړى، خو د صادِقانو نه به حفاظت وکړى.

¹⁸هر وخت د مالِک خُدائ د نېکانو په ژوندون باندې نظر وی، او هغوئ ته به هغه میراث ورکړے شی چی ابدی وی.

¹⁹په وخت د مصيبت کښې به هغوئ شرمنده نۀ شی، او دا چې د قحط په ورځو کښې به هغوئ ماړۀ شی.

²⁰خو بدکاران به فنا شی، او د خُدائ دشمنان به لکه د صحرا د ګلونو په شان ختم شی، او لکه د لوګى په شان به د نظر نه فنا شی.

²¹قرض اخلى او هیڅکله يې نۀ واپس کوی بدکاران، خو ورکوی خیر خیرات په سخاوت سره صادِقان.

²²مالِک خُدائ چې چا ته برکت ورکړی دوئ به د زمکې وارثان شی، خو په چا چې لعنت وکړی د دنيا نه به فنا شی.

²³مالِک خُدائ د نيکانو قدمونه سموی، او که د هغوئ په هر عمل باندې خوشحالى کوی.

²⁴کۀ تيندک وخوری نو وبه نهٔ غورزیږی، ځکه چې مالِک خُدائ يې په خپلو لاسونو کښې اوچتوی.

²⁵ځوان ومه، بوډا شومه، صادِقان مې بې اسری لیدلی نۀ دی، او د هغوئ بچى مې د ډوډۍ په سوال ليدلى نهٔ دی.

²⁶په آزاد لاس ورکوی سخاوتونه نيکان، د دې برکتونه به وګوری د هغوئ بچیان.

²⁷د بدو لاس په سر شئ، ښۀ کارونو ته ځان سپارئ، نو بيا به تاسو ټول عمر په دنيا کښې اوسېږئ.

²⁸مالِک مینه کړى د اِنصاف سره او هغه به هیڅکله ‎پرې نهٔ ږدی نيکان، هغه به دوئ وساتی په امان خو تباه به شى اولاد د بدکاران.

²⁹خو نيکانو ته به زمکه په ميراث کښې ورکړی، او صادِقان به تر ابده په کښې سکونت کړی.

³⁰نېکان خلق خبرې د حکمت کړی، او د هغوئ ژبه د اِنصاف خبرې کړی.

³¹د خُدائ پاک قانون د هغهٔ په زړهٔ کښې دے، نو ځکه د سمې لارې نه نهٔ ښوئيږى د هغهٔ خپې.

³²بدکاران صادِقانو ته پټ ناست وی، ‎ او د هغوئ د قتلولو موقع لټوی.

³³مالِک خُدائ به يې هغوئ ته حواله نۀ کړی، په وخت د عدالت به صادِقان مجرمان نۀ کړی.

³⁴او په مالِک خُدائ باندې توکل کوئ او د هغهٔ د حُکمونو اطاعت کوئ، هغه به تا اوچت کړی چې زمکه درله درکړی. او تهٔ به وګورې چې بدعمله تباه کړی.

³⁵ما بې رحمه او ظالمان ليدلى دی، لکه څنګه چې شنه ونه په خپل ځائ کښې لوئېږی.

³⁶خو چې دوباره مې ولیدل، هغوئ د دنيا نه تللی وُو، ما چې کله هغوئ لټول نو بیا نهٔ وُو.

³⁷نيکانو او صادِقانو ته وګوره، د دوئ آئنده به وی په خیر سره.

³⁸خو باغیان به ټول تباه شی، او د هغوئ نسل به نیست و نابود شی.

³⁹مالِک خُدائ نيکانو ته خلاصُون ورکوی، او هغه په وخت د مصيبت کښې دوئ ته پناه ورکوی.

⁴⁰مالِک خُدائ د هغوئ مدد کوى، او د بد عملو نه خلاصُون ورکوی، هغه دوئ بچ کوی ځکه چې دوئ د هغهٔ نه پناه اخلی.