Read Pashto Bible (Yusufzai) — د پښتو مقدس کتاب زبور 40 Bible Online

زبور 40 - Pashto Bible (Yusufzai) — د پښتو مقدس کتاب bible

زبور 40

¹په صبر ما د مالِک خُدائ انتظار وکړو، او هغۀ زما فرياد واوريدو او ما ته يې پام وکړو.

²هغهٔ زهٔ د هلاکت د کندې نه رابهر کړم، او د لمدو خټو نه يې راوويستم. زما خپې یې په ګټ کېښودې او مضبوط یې ودرولم.

³هغۀ زما په ژبه باندې نوې نغمه سازه کړه، او زمونږ د خُدائ پاک د ثناء صفت حمد يې راکړو، ډېر چې دا ووينى نو هغوئ به وویریږی او په مالِک خُدائ به یقین وکړی.

⁴هغه سړے به بختور وی د چا چې ایمان په مالِک خُدائ وی، څوک چې مغرورانو ته رجوع نهٔ کوی، د هغه کبرژنو څوک چې د بُتانو په وجه ګمراه شوی دی.

⁵اے مالِکه خُدايه، زما خُدايه، تا زمونږ دپاره ډیرې معجزې کړی دی، تا زمونږ دپاره بې حسابه منصُوبې جوړې کړی دی. ستا سره هیڅ څوک برابر نشته دے زهٔ يې شمیرلے نهٔ شم ستا عجيبه کارونه خو بې شمیره دی.

⁶تهٔ خو د چا نه قربانئ او نذرانې نهٔ غواړې، تا زۀ په دې خبره باندې پوهه کړم، د هیچا نه هم سوزېدونکې يا د ګناه نذرانې نۀ غواړې.

⁷ما درته ووئيل چې، ”ګوره زهٔ حاضر يم، لکه څنګه چې په تورات کښې لیکلے شوی دی نو هغه وکړم.

⁸پاکه خُدايه، چې زۀ ستا رضا پوره کړم، ستا قانون زما په زړۀ کښې لیکلے شوے دے.“

⁹ما ستا د خلاصُون زیرے په لوئ جماعت کښې بيان کړو، مالِکه خُدایه تۀ ښهٔ خبر یې چې ما خپل بيان بند نۀ کړو،

¹⁰ما په زړۀ کښې ستا د خلاصُون خبره پټه نۀ کړه، هر ځائ کښې مې ستا د وفادارۍ او خلاصُون خبره وکړه. ما ستا د ابدې مينې او وفادارۍ خبره په لوئ جماعت کښې وکړه.

¹¹مالِکه خُدايه، خپله مهربانى به په ما نۀ بندوې، ستا وفادارى او ابدى مینه به همېشه ما بچ کوی.

¹²خو زهٔ ډيرو مصیبتونو راګیر کړے یم، لار رانه خطا شوه په ګناهونو کښې ډوب شوے یم، ګناهونه مې د سر وېښتو نه ډېر دی بې وسه شوے یم.

¹³ما بچ کړه، مالِکه خُدايه، د مدد دپاره زر راشه، اے مالِکه خُدايه.

¹⁴څوک چې په کوشش زما د ژوند د ختمولو شی هغوئ دې وشرمېږى او وارخطايئ سره دې مخ شی، څوک چې په نېت زما د خرابولو شی هغوئ ټول دې ناکامه او شرمنده شی.

¹⁵هغوئ دې ټول په شرم وشرمېږی، څوک چې راپورې خندا کوی او ما پورې لګیږی.

¹⁶څوک چې ستا په لټون شی هغوئ دې ټول تا سره خوشحاله شی، څوک چې ستا خلاصُون سره مینه کوی او دوئ دې تل دا وائی چې، ”مالِک خُدائ لوئ دے!“

¹⁷بيا هم زۀ غريب او حاجت مند يم، زهٔ دې د مالِک خُدائ په نظر یم. زما مدد ګار او خلاصوونکیه، زر راشه، اے پاکه خُدايه.