Read Pashto Bible (Yusufzai) — د پښتو مقدس کتاب زبور 41 Bible Online

زبور 41 - Pashto Bible (Yusufzai) — د پښتو مقدس کتاب bible

زبور 41

¹بختور دے هغه څوک چې د مسکینانو خيال ساتی، کله چې دے په تکلیف کښې وی مالِک خُدائ ورته خلاصُون ورکوی.

²مالِک خُدائ به د هغهٔ حفاظت کوی او ژوند به يې په امان کښې ساتی، هغه به په دنيا کښې ورته برکت ورکړی او د دشمنانو د لاس نه به يې ساتی.

³مالِک خُدائ به يې په بيمارئ کښې خيال ساتى او هغه به يې د بیمارئ د کټ نه روغ رمټ کړى.

⁴ما ووئيل چې، ”اے مالِکه خُدايه، په ما رحم وکړه ماته شفا راکړه، ځکه چې ما ستا خلاف ګناه کړې ده.“

⁵زما دشمنان په بدنيتئ سره داسې وائى چې، ”کله به دے مړ شی، او نوم به يې څومره زر د زمکې مخ نه ورک شی؟“

⁶هغوئ چې کله زما ليدو ته راځى نو فضول خبرې کوی، او دروغ وائی او په زړهٔ کښې شرارت راجمع کوی، او چې کله بهر ووځی نو په هر ځای کښې زما غیبت کوی.

⁷زما دشمنان ټول زما په خلاف خبرې کوی، هغوئ زما په خلاف بد سوچونه کوی،

⁸او دوئ وائی چې، ”په سخت رنځ پروت دے او د بیا پاڅيدو امکان يې د د‎ې رنځ نه نشته دے.“

⁹تر دې چې زما نزدې دوست په چا باندې چې ما پوره يقين کولو، نو هغه چا چې ډوډۍ به يې ما سره خوړه هغه هم زما خلاف شولو،

¹⁰خو تهٔ، اے مالِکه خُدايه، په ما رحم وکړه، چې د هغوئ نه خپله بدله واخلم، ما دوباره روغ کړه.

¹¹چې تۀ رانه رضا يې زۀ په دې پوهېږم، تا زهٔ د دشمنانو لاسونو ته پرې نهٔ ښودم.

¹²تا زهٔ زما د تقوىٰ په وجه اوچت کړم، او د تل دپاره دې په خپل حضُور کښې وساتلم.

¹³مبارک دې وی مالِک، د بنی اِسرائيلو خُدائ، د ازل نه تر ابده آمين، آمين