Read Pashto Bible (Yusufzai) — د پښتو مقدس کتاب زبور 42 Bible Online

زبور 42 - Pashto Bible (Yusufzai) — د پښتو مقدس کتاب bible

زبور 42

¹څنګه چې هوسۍ د نِهر اوبو پسې تلوسه کوی، داسې خُدايه پاکه، زړۀ مې تا پسې تلوسه کوی.

²زما زړهٔ د خُدائ پاک تږے دے، زهٔ د ژوندی خُدائ پاک تږے یم. زهٔ به کله لاړ شم چې د هغۀ حضُور کښې ودرېږم؟

³اوښکې مې خوراک دی شپه او ورځ زهٔ ژړېږم، هر وخت راته خلق لګيا وى، ووایه، ”ستا خُدائ چرته دے؟“

⁴تېر وخت چې راپه ياد شى په زړهٔ باندې غمژن شم، چې څنګه ډيرو خلقو سره به زهٔ د خُدائ کور ته تلم، او هغوئ به مې د خُدائ پاک عبادتګاه ته په خپله مشرئ کښې بوتلل، نو په لویه ډله کښې به ما په تیزه د هغوئ سره د خوشحالئ په آواز د شکرګذارئ ثنا وئيله،

⁵ولې خفه کېږې زما روحه؟ دومره ولې پرېشانه کیږې تهٔ؟ په خُدائ پاک باندې توکل کوه مۀ پرېشانه کېږه تهٔ، زۀ به بيا ستا ثناء صفت بيان کړم، پاکه خُدایه ځکه چې هم تا زهٔ خلاص کړم.

⁶زړۀ مې پرېشانه دے نو ځکه زهٔ تا یادوم، د اردن لری ملک او د حرمون او د مِضار د اوچت غرونو نه زهٔ تا يادوم.

⁷ستا د ژورو سمندرونو او ابشارونو شور زۀ اورم، موجونو او چپو د سمندر زهٔ ډوب کړم.

⁸مالِک خُدائ د ورځې خپله ابدى مینه په ما راوروی، د هغهٔ حمد په شپه کښې زما زړهٔ کښې وی، دعا کوم هغه خُدائ پاک ته چې څوک ژوند راکوی.

⁹څوک چې زما مضبوط ګټ دے، زۀ به خُدائ پاک ته داسې ووايم، ”ولې دې هېر کړے يم زما دشمنان په ما دومره ظُلم ولې کوی چې زهٔ غمژن ګرځم؟“

¹⁰د دشمن پيغور هډوکى مات کړل ما له هر وخت راته لګيا وى دشمنان زما، چې ووایه، ”اوس چرته دے خُدائ پاک ستا؟“

¹¹ولې خفه کېږې زما روحه، دومره ولې پرېشانه کیږې تهٔ؟ په خُدائ پاک باندې توکل کوه مۀ پرېشانه کېږه تهٔ؟ زۀ به بيا ستا ثناء صفت بيان کړم، خُدایه ځکه چې هم تا زهٔ خلاص کړم.