Read Pashto Bible (Yusufzai) — د پښتو مقدس کتاب زبور 46 Bible Online

زبور 46 - Pashto Bible (Yusufzai) — د پښتو مقدس کتاب bible

زبور 46

¹خُدائ پاک زمونږ پناه ګاه او قوت دے، په وخت د مصيبت کښې حاضر او تل مددګار دے.

²نو مونږ به نهٔ یریږُو کۀ په زمکه زلزله راشی، او کۀ غرونه د سمندر په مينځ کښې راګذار شی.

³او یا د سمندر اوبۀ غرار او ځګونه وکړی، او غرونه د اوبو د زور په وجه وښوزولے شی.

⁴یو بل دریاب دے چې نهرونه یې د خُدائ پاک ښار خوشحالوی، او د خُدائ تعالىٰ مقدس کور خوشحالوی.

⁵او خُدائ پاک د هغه ښار په مينځ کښې اوسيږی نو هغه به نۀ تباه کېږی، او د سحر وختی نه د هغه ښار ساتنه کوی.

⁶قومونه وارخطا دی، بادشاهتونه به نسکور شی. کله چې خُدائ پاک آواز وکړى نو دا زمکه به ویلې شی.

⁷رب الافواج خُدائ زمونږ مل دے، د یعقوب خُدائ پاک زمونږ پناه ګاه دے،

⁸راشئ او د مالِک خُدائ کارونه وګورئ، هغه تباهى چې کومه هغۀ په دنيا باندې راوستلې ده وګورئ.

⁹هغه په ټوله دنيا کښې جنګونه ختموی، ليندې او نېزې ماتوى او ډالونه سوزوی.

¹⁰”په آرام شئ او په دې پوه شئ زۀ خُدائ پاک يم، زۀ به په ټولو قومونو کښې اعلىٰ یم، زهٔ به په ټوله دنيا کښې اوچت يم.“

¹¹رب الافواج خُدائ زمونږ مل دے، د یعقوب خُدائ پاک زمونږ پناه ګاه دے.