Read Pashto Bible (Yusufzai) — د پښتو مقدس کتاب زبور 47 Bible Online

زبور 47 - Pashto Bible (Yusufzai) — د پښتو مقدس کتاب bible

زبور 47

¹اے ټولو خلقو لاسونه ووهئ، او د خوشحالئ سرود په اوچت آواز سره ووايئ.

²مالِک خُدائ تعالىٰ څومره د رعب داب مالِک دے، هغه په ټولې دنيا لوئ بادشاه دے.

³هغهٔ ټول قومونه زمونږ تابع کړل، او ملکونه يې زمونږ د خپو لاندې کړل.

⁴مونږ له يې په ميراث کښې زمکه راکړله، په کومه چې یعقوب فخر کولو او د هغه چا سره چې خُدائ مينه کوله.

⁵خُدائ پاک د خلقو په نارو سورو کښې تخت ته خېژى، چې مالِک خُدائ بره تخت ته ځى نو د بيګلو آوازونه دی.

⁶د خُدائ پاک ثنا صفت کوئ ثنا يې ووايئ، زمونږ بادشاه ته سندرې او ثنا صفت ووايئ.

⁷ځکه خُدائ پاک په ټوله زمکه بادشاه دے، هغۀ ته د ثناء حمد، زبور ووایئ.

⁸خُدائ په خپل مقدس تخت باندې ناست دے، او په ټولو قومونو بادشاهی کوی.

⁹د دنيا حُکمرانان رايوځائ شوی دی، د اِبراهيم د خُدائ خلق ورسره دی، د دنيا ټول بادشاهان د خُدائ پاک دی، نو ځکه د هغۀ په هر ځائ کښې ډېر عزت کېږی.