Read Pashto Bible (Yusufzai) — د پښتو مقدس کتاب زبور 48 Bible Online

زبور 48 - Pashto Bible (Yusufzai) — د پښتو مقدس کتاب bible

زبور 48

¹مالِک خُدائ لوئ دے، او د ثناء صفت لائق دے، زمونږ د خُدائ په ښار، يعنې مقدس غر کښې.

²د هغهٔ ښار په خپل اوچتوالى کښې ښکلے دے، او ټولې دنيا ته خوشحالې ورکوی. د صيون غر او مقدس غر چې د لوئ بادشا ښار دے،

³خُدائ په خپله د دې ښار په سنګرونو کښې موجود دے، او خپل ځان يې د ښار محافظ ښودلے دے.

⁴وګوره چې د دنيا بادشاهانو لښکرې رایو ځائ کړې او متحد شول، او د ښار په خلاف د جنګ په خيال راوړاندې شول.

⁵هغوئ چې هغه ښار وليدو نو حق حیران شول، ټول د يرې نه په تېښته وتښتيدل.

⁶هغوئ هلته د يرې نه شول په لړزان، څنګه چې په تکلیف پیدا کيږی ماشومان.

⁷لکه د ترسيس د بحری بيړو په شان تا هغوئ تباه کړل، د زورَور مشرقی بادونو په زور دې تس نس کړل.

⁸لکه څنګه چې مونږ اوریدلی نو اوس مو په خپلو سترګو ولیدل، زمونږ د خُدائ په ښار یعنې د رب الافواج په ښار کښې، خُدائ به تل دا ښار آبادولو او د هغې حفاظت به يې کولو.

⁹اے پاکه خُدایه، مونږ ستا په عبادتګاه کښې يُو، او ستا په نهٔ ختمیدونکې مينې باندې فکر کوُو.

¹⁰اے خُدایه، لکه څنګه چې دې نوم په ټوله دنيا خور د‎ے، دغه شان ستا ثناء صفت په ټوله دنيا خور دے، ستا ښے لاس د صداقت نه ډک دے.

¹¹د صيون د غر خلق دې خوشحالی وکړی، او د یهُوداه ټول ښارونه دې خوشحالى وکړی دا ټول دې ستا د عدالت په وجه خوشحالى وکړی.

¹²صيون ته لاړ شئ او ګیر چاپیره ترې نه وګرځئ، او برجونه یې وشمېرئ،

¹³دیوالونو ته یې وګورئ او په محلونو يې نظر واچوئ، ترڅو تاسو د هغې نه خپل آئنده نسلونه خبر کړئ.

¹⁴ځکه چې هم دا خُدائ د تل دپاره زمونږ خُدائ پاک دے، هغه تر آخر وخته زمونږ رهنما دے.