Read Pashto Bible (Yusufzai) — د پښتو مقدس کتاب زبور 55 Bible Online

زبور 55 - Pashto Bible (Yusufzai) — د پښتو مقدس کتاب bible

زبور 55

¹اے پاکه خُدايه، واوره سوال زما، ځان مه غلے کوه په سوال زارئ زما.

²جواب راکړه او واوره زما. خپلو پریشانو ډیر زوروَلے يم،

³زما دشمنان ما یره وى، او ښکاره دهمکیانې راکوی، او په خپل قهر کښې دوئ زما نه نفرت کوی.

⁴په سینه کښې د یرې نه درزیږى زړهٔ زما، او د مرګ يرې زۀ راګیر کړے يم.

⁵يرې يم نيولے په لړزان يم، زۀ یرې او رپیدلو راخستے یم.

⁶کاش چې زما د ګوګوشتکو په شان وزرې وے، زۀ به په هوا کښې الوتلے او په آرام به وے.

⁷زۀ به په هوا کښې الوتلے د دې ځايه وے، زهٔ به په صحرا کښې اوسيدلے وے.

⁸ما به ځان دپاره په تيزۍ سره د پناه ځائ لټولے وے تر څو چې زهٔ دې سختو هواګانو طوفانونو نه امان کښې وے.

⁹اے مالِکه خُدايه د بدکارو خبرې ګډې وډې کړه، ځکه زۀ په ښار کښې وینمه ظُلم او جنګونه.

¹⁰د حمله کوونکو خلاف يې شپه او ورځ د دیوالونو نه ګشت کیږی، خو حقيقى خطره هغه بدعملى ده کومه چې په ښار کښې دننه کیږی.

¹¹تباهى يې د ښار په مينځ کښې ده، ډکې دی کوڅې د ظُلم او دوکې نه.

¹²کۀ چرے دشمن کوله بې عِزتی زما، نو دا به برداشت کړے وے ما، کۀ دشمن چرے پخپله راپاڅیدلے وے په خلاف زما، نو خپل ځان د هغوئ نه به پټ کړے وے ما.

¹³خو دا تۀ يې او اِنسان یې لکه زما، او ملګرے او نزدې دوست يې زما.

¹⁴مونږ به د يو بل سره ښې خوږې خبرې کولې، او د خُدائ د کور په ګڼه کښې به یو ځائ ګرځيدلو.

¹⁵زما دشمنان دې ناګهانه مړهٔ شی، هغوئ دې په قبر کښې ژوندى ورښخ شی، ځکه چې شرارت د دوئ په زړونو کښې وردننه شوے دے.

¹⁶خو زۀ به خُدائ پاک ته آواز وکړم، او مالِک خُدائ به بچ کړی ما.

¹⁷سحر، غرمه او ماښام به زهٔ هغهٔ ته خپل فريادونه وړاندې کوم، او هغه به واوری آواز زما.

¹⁸هغه به مې په حفاظت سره بچ کوی، د هغه جنګ نه کوم چې زما په خلاف وی، کۀ څهٔ هم چه ډیر خلق زما په ضد وی.

¹⁹خُدائ پاک چې د ازل نه په تخت ناست دے، هغه به زما سوال واورى او هغوئ له به شکست ورکړی. کوم خلق چې خپلې لارې نهٔ بدلوی، او د خُدائ پاک نه نۀ يریږی.

²⁰زما ملګرى په خپلو دوستانو باندې حمله کړى ده، او خپل تړون يې مات کړے دے.

²¹د هغۀ خبرې خوږې پستې دی، خو د هغۀ په زړۀ کښې خبرې د نفرت دی. د هغۀ خبرې د تیلو په شان نرمې دی، خو دا د تیرو تُورو په شان غوڅونکې دی.

²²خپل مشکلات مالِک خُدائ ته پریږده، او هغه به ستا حفاظت وکړی، هغه صادِقان نۀ پریږدى چې شکست وخوری.

²³خو، اے پاکه خُدایه، تهٔ په خپله د تباهئ په کنده کښې وغورزوې شريران، په ځوانئ کښې به مړهٔ شی دوکه ماران او قاتلان. خو زۀ به لرم په تا باندې ایمان.