Read Pashto Bible (Yusufzai) — د پښتو مقدس کتاب زبور 56 Bible Online

زبور 56 - Pashto Bible (Yusufzai) — د پښتو مقدس کتاب bible

زبور 56

¹اے پاکه خُدايه، په ما رحم وکړه، خلق راپسې شوی دی، ټوله ورځ دشمنان په ما باندې سختې حملې کوی.

²زما دشمنان ټوله ورځ ما وهی. ډیر زیات دى مغروره څوک چې ما سره جنګ کوی.

³خو کله چې زۀ وويریږم، نو زۀ به په تا باندې توکل وکړم.

⁴کومه وعده چې هغهٔ کړې ده، زهٔ د خُدائ پاک ثناء صفت کوم. نو زهٔ نهٔ یریږم ځکه چې په خُدائ باندې توکل کوم. نو فانی اِنسان به ما سره څهٔ وکړی؟

⁵زما دشمنان ټوله ورځ زما خبرې بدلوی، هر وخت هغوئ زما خلاف منصُوبې جوړوی.

⁶ټول راټول شوی دی او پټ ناست دی، په هر قدم کښې راپسې دی او زما د مرګ خواهش کوی.

⁷چې په خپل شرارت کښې وتښتى دوئ مه پریږدئ، اے پاکه خُدایه، په خپل قهر او غضب کښې دې دوئ ته شکست ورکړه.

⁸تهٔ د ټولو تکلیفونو نه خبر يې زما، اُوښکې دې يو لوښې کښې راغونډې کړې دی زما، ټول د غم حساب دې په خپل کِتاب کښې ليکلے زما.

⁹دشمنان به مې وتښتى چې په کومه ورځ تا ته آواز وکړم، خُدائ زما ملګرے دے زهٔ په دې باندې پوهیږم.

¹⁰کومه وعده چې خُدائ پاک ما سره کړې ده په هغې زهٔ د خُدائ ثناء صفت کوم. او کومه وعده چې مالِک خُدائ کړې ده په هغې زهٔ د خُدائ شکر ګذار یم.

¹¹نو زهٔ نهٔ یریږمه ځکه چې په خُدائ پاک باندې توکل کوم. نو فانې اِنسان به ما سره څهٔ وکړی؟

¹²اے پاکه خُدایه، زهٔ به تا سره د نذرانې وعده خپله سر ته رسوم، زهٔ به تا ته د شکر ګذارئ نذرانه پیش کوم،

¹³تا زهٔ د مرګ نه خلاص کړم. تا په خپله زهٔ د تيندک خوړلو نه وساتلم، چې زهٔ د ژوند په نُور کښې د خُدائ په حضُور کښې وګرځم.