Read Pashto Bible (Yusufzai) — د پښتو مقدس کتاب زبور 62 Bible Online

زبور 62 - Pashto Bible (Yusufzai) — د پښتو مقدس کتاب bible

زبور 62

¹زما ځان صرف په خُدائ پاک کښې آرام مومی، ځکه چې زما خلاصُون د هغۀ نه دے.

²هغه په خپله زما ګټ او خلاصُونکے دے، او زهٔ به هیڅکله په لړزان نهٔ شم هغه زما د امان ځائ دے.

³تاسو ټول به ترڅو په سړى باندې حملې کوئ؟ کوم کس چې د کچه دېوال او کمزورې باړ په شان وی.

⁴دوئ صرف په دې سوچ کښې دی چې هغه د خپل عزت مقام نه راوغورزوی. دوئ له دروغ وئيل خوند ورکوی، په خولهٔ خو دوئ برکت ورکوی، خو په زړهٔ کښې دوئ لعنت کوی.

⁵اے زما روحه صرف په خُدائ پاک کښې په آرام سره صبر وکړه. ځکه چې زما ټول اُميدونه هغهٔ پورې تړلى دی.

⁶هغه په خپله زما ګټ او خلاصُونکے دے. او زهٔ به هیڅکله په لړزان نهٔ شم هغه زما د امان ځائ دے.

⁷زما عزت او خلاصُون د خُدائ له طرفه دے، هغه زما غټ ګټ او پناه ګاه دے.

⁸اے خلقو هر وخت هغۀ باندې يقين ساتئ. تاسو هغۀ ته د خپل زړهٔ مشکل بيانوئ، ځکه چې خُدائ پاک زمونږ پناه ګاه دے.

⁹عام خلق څۀ حيثيت نۀ لرى د هغۀ په وړاندې، زورَور خلق هم هغه نۀ دی کوم چې دوئ ښکاری، کۀ هغوئ ټول په تله وتلى دا به د هوا نه هم سپک وی.

¹⁰چې په ظُلم زیاتى يقين ونۀ کړئ، او نۀ د غلا د مال اسرا وکړئ. ولې چې ځان ورپورې ونۀ تړئ، هر څومره چې دولت ستا زياتیږی.

¹¹خُدائ پاک یو ځل ووئيل، نو ما بار بار واوريدل: چې خُدائ پاک زورَور دے،

¹²او چې پاکه خُدایه ستا مینه نهٔ ختمیدونکې ده. بې شکه چې تهٔ هر چا ته د هغوئ د کارونو په مطابق اجر ورکوې.