Read Pashto Bible (Yusufzai) — د پښتو مقدس کتاب زبور 63 Bible Online

زبور 63 - Pashto Bible (Yusufzai) — د پښتو مقدس کتاب bible

زبور 63

¹اے خُدایه، تهٔ زما خُدائ پاک يې. د زړهٔ نه ستا په لټون کښې یم، روح او زما ځان ستا تږے دے، لکه اوبهٔ چې نهٔ وى په زمکه خشکه او شاړه.

²تهٔ ما په خپل مقدس مقام کښې ليدلے يې، او ستا جلال او زور هم ما ليدلے دے.

³ستا نهٔ ختمیدونکې مینه د ژوند نه ښۀ ده، نو ځکه به زما شونډې ستا لوئې بيانوی.

⁴تر څو چې زهٔ ژوندې یم ستا ثناء صفت به ادا کوم، او خپل لاسونه به په دعا کښې ستا په نوم پورته کړم.

⁵ځان به زما داسې موړ شی لکه په غوره خوراک. زهٔ به په خوشحالۍ سره وایم ستا ثناء او صفت،

⁶زۀ چې پروت يمه په کټ کښې هم تا یادوم، ستا په حقله شپه کښې ټوله شپه فکر کوم.

⁷ځکه چې تهٔ زما مددګار يې، په سورى د وزرو کښې ستا د خوشحالۍ سندرې وايم.

⁸ما خپل ځان تا پورې تړلے دے، ستا زورَور لاس زهٔ په امان کښې ساتلے یم.

⁹څوک چې کوشش کوی زما د وژلو، خو دوئ به ټول لاړ شی لاندې د خاورو.

¹⁰په جنګ کښې به هغوئ لاندې شی د تُورو، او دوئ به شی خوراک د ګیدړانو.

¹¹خو بادشاه به خوشحالیږى د خُدائ پاک په نوم، او ټولو چا چې د خُدائ په نوم قسم خوړلے، هغوئ به د هغۀ ثناء صِفت کوی، ځکه چې د دروغجنو خولې به بندې شی.