Read Pashto Bible (Yusufzai) — د پښتو مقدس کتاب زبور 71 Bible Online

زبور 71 - Pashto Bible (Yusufzai) — د پښتو مقدس کتاب bible

زبور 71

¹زما مالِکه خُدایه ستا پناه له راغلے یم، ما مه پریږده چې په شرم وشرميږم،

²په خپل صداقت سره دې ما بچ کړه او خلاصُون راکړه، ما ته غوږ ونیسه او ما بچ کړه.

³تهٔ زما د پناه ګټ شه چرته چې زهٔ هر وخت ورتلے شم، تهٔ حُکم ورته وکړه چې زهٔ په کښې بچ شم. ځکه چې تهٔ يې زما ګټ او قلعه.

⁴زما پاکه خُدایه، ما د بدعملو د لاسونو نه خلاص کړه، او د بد کارانو او ظالمانو د قبضې نه مې خلاص کړه.

⁵اے قادر مطلق مالِکه خُدایه صرف تهٔ زما اُميد يې، او د ورکوټوالی نه په تا باندې توکل کوم.

⁶زما د پیدا کيدو سره سم ما هم په تا بهروسه کړې ده، او هم تا زما خيال وساتلو د مور په ګیډه. زهٔ به همیشه ستا ثناء صفت کوم.

⁷د ډېرو خلقو په وړاندې عجيبه غوندې مثال ګرځیدلے يم، خو تۀ مضبوطه پناه ګاه يې زما دپاره.

⁸ټوله ورځ زهٔ په ژبه ستا ثناء صفت کوم، ستا شان او شوکت ټوله ورځ بيانوم.

⁹په بوډاوالې کښې چې ما ونۀ غورزوې، هرکله چې زما زور ختم شى ما مه هيروه.

¹⁰زما دشمنان زما په خلاف خبرې کوی، څوک چې راپسې دی هغوئ زما د وژلو بندوبست کوی.

¹¹دوئ وائى، ”خُدائ پاک ترې نه لاس اخستے دے نو ورپسې شئ او راټینګ يې کړئ. هیڅ څوک نشته چې هغهٔ ته خلاصُون ورکړی.“

¹²زما نه لرې مه اوسیږه، اے مالِکه خُدایه، زما پاکه خُدایه، ستا منت کوم ما ته زر راشه.

¹³څوک چې ما پورې تور تړى نو اود‎ې شرمیږى او تباه دې شی، څوک چې ما ته نقصان رسول غواړى، هغوئ دې سپک شى او په شرمونو کښې دې پټ شی.

¹⁴خو زهٔ به همیشه دپاره ستا نه اُميد کوم، زۀ به ستا ثناء صفت ډیر ډیر کوم.

¹⁵زهٔ به په خپله ستا صداقت بيان کړم، ټوله ورځ به ستا خلاصُون بيانوم، کۀ څهٔ هم زهٔ په وینا کښې ماهر نهٔ یم.

¹⁶اے قادرِ مطلق مالِک خُدایه زهٔ به ستا د لويئ کارونه بيان کړم. چې صرف تهٔ اِنصاف کوونکے يې زهٔ به هر چا ته ووایم.

¹⁷د ورکوټوالى نه دې ما ته تعلیم راکړے اے پاکه خُدایه، زهٔ تر ننه پورې ستا عجيبه کارونه ستايم.

¹⁸کۀ چرى زهٔ هم بوډا او سپین ږیرے شم، خو اے پاکه خُدایه، ما مه پریږده ځان له، تر څو چې زهٔ راتلونکې نسل ته ستا قدرت بيان نهٔ کړم، او ټولو راروان نسلونو ته ستا زور بيان نهٔ کړم.

¹⁹ستا صداقت آسمانونو ته رسیږى پاکه خُدایه، هم دا تا کړې دی لوئ کارونه. ستا په شان بل څوک نشته پاکه خُدایه.

²⁰کۀ څهٔ هم تا زۀ د ډېرو سختو سره مخ کړم، تهٔ به دوباره ما ژوندې کړې، او د زمکې د ژورې کندې نه به مې راوباسې.

²¹تهٔ به زما عزت زیات کړې، يو ځل بیا به ډاډګيرنه راکړې.

²²زۀ به ستا ثناء صفت د بينجو په ساز کښې کوم، ځکه چې تهٔ په خپلو وعدو وفادار يې، زۀ به د رباب په نغمو کښې ستا صِفت کوم، اے د بنی اِسرائيلو مقدس خُدایه.

²³زما شونډې به د خوشحالئ وکړی آوازونه، کله چې زهٔ ستا ثناء صفت کومه، ځکه چې تا زهٔ بچ کړے یم.

²⁴زما ژبه به ستا صداقت ټوله ورځ بيانوی، ځکه چا چې غوښتل چې ما ته نقصان ورسوی هغوئ به په شرم او په بې عِزتئ اخته وی.