Read Pashto Bible (Yusufzai) — د پښتو مقدس کتاب زبور 76 Bible Online

زبور 76 - Pashto Bible (Yusufzai) — د پښتو مقدس کتاب bible

زبور 76

¹خُدائ پاک په یهُوداه کښې مشهور دے، د هغهٔ په بنی اِسرائيلو کښې لوئ نوم دے.

²د هغهٔ خیمه په شالیم کښې ده، او د هغهٔ استوګنه په صيون کښې ده.

³هلته هغهٔ د اور غشی مات کړل، ډالونه او تورې او اسلحه يې د جنګ مات کړل.

⁴تۀ نوُر او جلال لرې، د اوچتو غرونو نه زیات شان او شوکت لرې.

⁵د دشمنانو تکړه کسان هلته لوټ شول او په ”ابدې خوب اودهٔ شول.“ يو جنګیالى بیا هم خپل لاسونه اوچتولے نهٔ شول.

⁶ستا په رټلو، اے د يعقوب پاکه خُدایه، آسونه او سورلى يې دواړه شول په ”خوب اودهٔ.“

⁷صرف ستا نه یریدل په کار دی، کله چې تۀ په قهر يې څوک ستا په وړاندې اودريدے شی؟

⁸کله چې تا د آسمان نه د اِنصاف ناره وکړه. نو زمکه ویريدله او خاموشه شوه

⁹اے پاکه خُدايه، کله چې تهٔ د عدالت دپاره ودریږې، چې د دنيا ټول مظلومان بچ کړى.

¹⁰ځکه د اِنسانانو غصه ستا د ثناء سبب جوړیږی، او د هغوئ د قهر نتيجه ستا د جلال باعث جوړیږی.

¹¹مالِک خُدائ خپل خُدائ ته منختې ومنئ او هغه بیا ورکړئ، هغوئ ټول چې د هغهٔ په خوا او شا کښې دی، او د چا نه چې یریدل په کار دی هغهٔ ته دې نذرونه ورکړی،

¹²هغه حاکمان عاجزان کوی، او د زمکې بادشاهان د هغهٔ نه یره کوی.