Read Pashto Bible (Yusufzai) — د پښتو مقدس کتاب زبور 77 Bible Online

زبور 77 - Pashto Bible (Yusufzai) — د پښتو مقدس کتاب bible

زبور 77

¹ما د مدد دپاره خُدائ پاک ته ژړا وکړه، ما ژړا وکړه خُدائ پاک ته چې زما واوره.

²کله چې ما باندې سخته وه مالِک خُدائ مې رایاد کړے وو. ټوله شپه مې خپل لاسونه د دعا دپاره اوچت کړی وُو. خو بیا هم زما زړهٔ بې قراره وو.

³اے پاکه خُدایه، په دردونو کښې زهٔ تا یادوم، او روح مې مړاوے شو او زهٔ په فکر کښې ډوب شوم.

⁴ستا نه ټوله شپه سترګې پټولے نهٔ شم، زۀ د ډېرې پریشانئ نه خبرې کولے نهٔ شم.

⁵ما په تیر شوو ورځو سوچ کولو، په تېر شوو کلونو باندې مې سوچ کولو.

⁶ما ټوله شپه خپل سرودونه یادول، په سوچونو کښې ډوب شوے وم او سوالونه راته پیدا شول:

⁷”ولې مالِک خُدائ به د تل دپاره ما شړى څهٔ؟ ولې هغه به بیا خپله مِهربانى ما ته نهٔ ښائی څهٔ؟

⁸ولې د هغۀ نۀ ختمېدونکې مينه د تل دپاره ختمه شوه څهٔ؟ ولې د هغهٔ وعده د تل دپاره ناکامیابه شوه څهٔ؟

⁹ولې خُدائ پاک مهربانى هېره کړې ده څۀ؟ ولې په غصه کښې هغۀ خپل رحم وا‎پس کړے دے څهٔ؟“

¹⁰نو بیا ما خپل ځان سره ووئيل چې، ”زهٔ څومره دردمند یم، چې د خُدائ تعالىٰ ښے لاس نور زما سره نهٔ دے.“

¹¹زهٔ به د مالِک خُدائ کارونه راپه یاد کړم. او زهٔ به ستا پخوانۍ معجزې رایادې کړم،

¹²زۀ به ستا په ټولو کارونو سوچ وکړم، او ستا په ټولو کارونو به فکر وکړم،

¹³اے پاکه خُدایه، ستا لارې او طریقې مقدسې دى، داسې کوم یو خُدائ دے چې زمونږ خُدائ پاک ته رسى؟

¹⁴تهٔ هغه خُدائ پاک يې چې معجزې کوی، تهٔ خپل قدرت د قومونو په مينځ کښې ښکاره کوې.

¹⁵په خپلو تکړه لاسونو دې خپلو خلقو ته خلاصُون ورکوې، د يعقوب او د يوسف اولاد ته خلاصُون ورکوې.

¹⁶اے پاکه خُدایه، کله چې اوبو تهٔ وليدلې، نو په اوبو باندې یرې نه لړزان راغلو، او په ژورو اوبو باندې سخته یره راغله.

¹⁷وریځو بارانونه راوورول، او په آسمان کښې د تندر آوازونه شول، او ستا د برېښنا غشې په کښې پړقیدل.

¹⁸ستا د تندر آوازونه په طوفان کښې واوريدے شول، ستا بریښنا ټوله دنيا رڼا کړه، زمکه په لړزان او رپیدو شوه.

¹⁹ستا لار د سمندر په مينځ کښې ده، او په خطرناکو اوبو کښې ستا لاره ده، کۀ څهٔ هم چې د خپې نښه دې نهٔ ښکاريده.

²⁰تا د خپلو خلقو رهنمائى لکه د رمو وکړه، د هارون او د موسىٰ په لاس دې د هغوئ رهنمائى وکړه.