Read Pashto Bible (Yusufzai) — د پښتو مقدس کتاب زبور 79 Bible Online

زبور 79 - Pashto Bible (Yusufzai) — د پښتو مقدس کتاب bible

زبور 79

¹اے پاکه خُدايه غېر قومونو ستا ملک قبضه کړے دے، هغوئ ستا د مقدس کور بې حرمتی وکړه او هغوئ یروشلیم په کنډرو بدل کړے دے.

²هغوئ ستا د خادمانو لاشونه د هوا مارغانو ته وغورزول، او ستا د مقدسینو غوښې يې ځنګلی ځناورو ته واچولې.

³هغوئ د دوئ وینه د یروشلیم په کوڅو کښې لکه د اوبو توئ کړه، او داسې څوک نشته چې د دوئ مړی ښخ کړی.

⁴مونږ خپلو ګاونډیانو ته سپک ښکارو، او ګیر چاپیره خلق مونږ پورې خاندی او بې عِزتی مو کوی.

⁵ترڅو پورې به مالِکه خُدایه تهٔ مونږ ته په قهر يې ولې د تل دپاره څهٔ؟ تر څو پورې به ستا غېرت د اور په شان بلېږی؟

⁶خپل غضب دې په هغه قومونو نازل کړه چې تا نۀ پېژنی، هغه بادشاهتونو ته په قهر شه کوم چې دې نوم نۀ اخلی،

⁷ځکه چې هغوئ د یعقوب اولاد لواړ تیر کړے دے او ملک يې ورله په کنډرو بدل کړے دے.

⁸مونږ د پلار‌نيکۀ په ګناه مۀ نيسه، په مونږ دې ستا رحم زر تر زره راشی، ځکه چې مونږ ډير خوار زار شوې يُو،

⁹زمونږ مدد وکړه، اے زمونږ خلاصُونکې پاکه خُدایه، چې ستا نوم جلال ومومى، د خپل نوم په خاطر مونږ ته خلاصُون راکړه او زمونږ ګناهونه معاف کړه.

¹⁰غیر قومونه دې ولې داسې ووائی چې، ”د دوئ خُدائ پاک چرته دے؟“ زمونږ د سترګو په وړاندې دا قومونه پوهه کړه، چې تا د خپلو خادمانو د توئ شوې وینې انتقام واخستو.

¹¹د قيدیانو فرياد په خپله واوره، په چا چې د مرګ فیصله شوې ده د خپل مټ په زور دې هغه بچ کړه.

¹²اے مالِکه خُدایه، تهٔ زمونږ ګاونډیانو ته اووۀ چنده سزا ورکړه، د هغه سپکوالى په وجه کوم چې دوئ تا پورې کړے دے،

¹³نو بیا به مونږ ستا خلق ستا د شپول ګډې به ستا ثناء صِفت د تل دپاره وکړُو، او مونږ به ستا ثناء صفت د يو نسل نه تر بل نسله پورې جاری ساتُو.