Read Pashto Bible (Yusufzai) — د پښتو مقدس کتاب زبور 81 Bible Online

زبور 81 - Pashto Bible (Yusufzai) — د پښتو مقدس کتاب bible

زبور 81

¹خُدائ پاک ته د خوشحالئ حمدونه ووايئ څوک چې زمونږ زور دے، د يعقوب پاک خُدای ته سندرې ووايئ

²سازُونه وغږوئ او تمبل ووهئ، د رباب او بينجو سازونه وغږوئ.

³د نوې مياشتې په ليدو سره بيګل ووهئ، او زمونږ د اختر د ورځې په راتلو سره کله چې سپوږمئ پوره وی.

⁴دا د بنی اِسرائيلو دپاره اصُول دے، او د یعقوب د خُدائ پاک قانون دے.

⁵هغهٔ د یوسف دپاره یو قانون جوړ کړو، چې کله هغه د مصر په خلاف راووتو. چرته چې مونږ نا آشنا آواز واوريدلو چې پرې نهٔ پوهيدلو.

⁶هغه وائى چې، ”ما درله د اوږو نه بوج اخوا کړو، ما ستا لاسونه د دروند بوج نه آزاد کړل.

⁷تاسو چې په سخته کښې نارې وکړئ نو ما تاسو بچ کړئ، ما درله د تندر د وريځو نه جواب درکړو. کله چې په مریبه کښې اوبۀ نهٔ وې ما ستاسو ایمان وآزمائیلو.

⁸زما غوره شوو خلقو ماته غوږ ونيسئ تاسو ته خبردارے درکوم، کاش چې تاسو اے بنی اِسرائيلو، ما ته پام وکړئ.

⁹ستاسو په مينځ کښې دې غير معبودان نهٔ وی. تاسو چرى هم بل معبود ته سجده ونۀ کړئ.

¹⁰زۀ مالِک خُدائ، ستاسو خُدائ پاک یم، چا چې تاسو د مصر نه بهر راوويستئ. خپلې خولې خلاصې کړئ نو زهٔ به تاسو له خوراک درکړم.

¹¹خو زما خلق به زما خبره نهٔ اوری، بنی اسرا‎ئیل به زما تابعداری نهٔ کوی.

¹²نو ځکه ما هغوئ د دوئ د سخت زړهٔ عملونو ته حواله کړل، تر څو چې د خپلو زړونو خواهشونه پوره کړی.

¹³کاش چې زما خلق ما ته غوږ ونیسی، او کۀ چرے بنی اِسرائيل زما په نقش قدم لاړ شی،

¹⁴نو څومره زر به بیا ما د دوئ دشمنان تباه کړى وے، او د دوئ د دشمنانو په خلاف به ما خپل لاس اوچت کړے وے.

¹⁵څوک چې مالِک خُدائ سره کينه لری د هغۀ په وړاندې به د یرې نه په رپيدو پرېوځی، د هغوئ سزا به د تل دپاره وی.

¹⁶خو تاسو ته به د ښو غنمو خوراک درکړم، او تا به د صحرا په شاتو باندې موړ کړم.“