Read Pashto Bible (Yusufzai) — د پښتو مقدس کتاب زبور 95 Bible Online

زبور 95 - Pashto Bible (Yusufzai) — د پښتو مقدس کتاب bible

زبور 95

¹راځئ، چې مالِک خُدائ ته حمد‌و‌ثناء ووايُو، راځئ چې د خوشحالۍ نعرې زمونږ د خلاصُون ګټ ته ووايُو.

²راځئ چې په شکرګذارئ سره د هغۀ حضُور ته راشو، او د هغهٔ د حمد‌و‌ثناء سندرې ووايُو.

³ځکه چې مالِک خُدائ لوئ خُدائ پاک دے، هغه د ټولو معبودانو نه زورَور او لوئ بادشاه دے.

⁴د زمکې ژوروالے د هغهٔ په لاس کښې دے، د غرونو ټولې څُوکې د هغۀ دی.

⁵سمندرونه د هغهٔ دی ځکه چې هغهٔ جوړ کړی دی. او د هغهٔ لاسونو اوچه زمکه پیدا کړې ده.

⁶راځئ، چې عبادت او سجده وکړُو، راځئ، چې د مالِک خُدائ او د خپل خالق په حضُور کښې په ګوډو شو.

⁷ځکه چې هغه زمونږ خُدائ پاک دے، او مونږ د هغهٔ د سادین خلق یُو، او د هغهٔ رمه يُو د چا چې هغه خيال ساتی. کۀ تاسو نن ورځ د هغهٔ آواز واورئ،

⁸نو خپل زړونه مه سختوئ لکه څنګه چې تاسو په مریبه کښې سخت کړی وُو، او لکه څنګه چې تاسو د مسه په بیابان کښې سخت کړى وُو،

⁹چرته چې زهٔ ستاسو پلارانو آزمائيلے وم، د دې باوجود چې هغوئ هر څهٔ ولیدل چې ما ورله څهٔ کړی وُو.

¹⁰تر څلویښتو کالو پورې هغه نسل ته غصه وم، ما ووئيل چې، ”دا هغه خلق دی چې زړونه يې ما نه لری شوی دی، او دوئ زما لارې ونهٔ پيژندلې.“

¹¹نو ما په خپله غصه کښې قسم وخوړلو چې، ”کله به هم هغوئ زما په آرام کښې داخل نهٔ شی.“