Read Pashto Bible (Yusufzai) — د پښتو مقدس کتاب زبور 97 Bible Online

زبور 97 - Pashto Bible (Yusufzai) — د پښتو مقدس کتاب bible

زبور 97

¹مالِک خُدائ بادشاه دے ټوله دنيا دې خوشحالی وکړی، او ټولې لرې جزیرې دې خوشحالی وکړی.

²او درنې وريځې او تیارې ترې نه راتاوې دی، اِنصاف او صداقت دواړه د هغهٔ د تخت بنيادونه دی.

³د هغهٔ نه وړاندې اور روان وی، په هر اړخ د هغهٔ دشمنان سوزوی.

⁴د هغهٔ بریښنا ټوله دنيا رڼا کوی، زمکه چې دا ګوری نو په لړزان وی.

⁵د مالِک خُدائ په وړاندې غرونه لکه موم داسې وېلې کېږی، د ټولې دنيا د مالِک خُدائ په مخ کښې داسې کېږی.

⁶آسمانونه د هغۀ صداقت بيانوی، او ټول قومونه د هغهٔ جلال وينی.

⁷هر هغه څوک چې د بُتانو عبادت کوی په شرم به وشرمېږی، هغوئ هم څوک چې په بې کاره بُتانو باندې نازیږی. اے ټولو معبودانو هغهٔ ته سجده وکړئ.

⁸د صیون ښار دا اوری او خوشحاليږى او د يهوداه کلی خوشحاله دی، ځکه ستا د عدالت په وجه مالِکه خُدايه دوئ خوشحاله دی.

⁹ځکه تهٔ، اے مالِکه خُدایه، په ټوله زمکه باندې د ټولو نه اوچت يې، او تهٔ په ټولو معبودانو کښې د ټولو نه ښهٔ او اُوچت يې.

¹⁰څوک چې د مالِک خُدائ سره مينه کوی نو هغوئ دې د بدئ نه نفرت کوی، هغه د خپلو وفادارانو حفاظت کوی، او هغه يې د بدعملو نه بچ کوی.

¹¹نور په صادِقانو وځليدلو، او خوشحالی شوه په هغوئ د چا زړونه چې صفا وُو.

¹²په مالِک خُدائ کښې خوشحالی وکړئ تاسو څوک چې صادِقان يئ، او د هغهٔ د مقدس نوم ثناء ووايئ.