Read Pashto Bible (Yusufzai) — د پښتو مقدس کتاب زبور 98 Bible Online

زبور 98 - Pashto Bible (Yusufzai) — د پښتو مقدس کتاب bible

زبور 98

¹سرود ووایئ مالِک خُدائ ته نوے سرود ووايئ، ځکه چې هغهٔ عجيبه او ښکلی کارونه کړی دی، د هغهٔ ښې لاس او د هغۀ مقدس مټ د هغهٔ دپاره د خلاصُون کارونه کړی دی.

²مالِک خُدائ خپل خلاصُون خلقو ته ښودلے دے، او خپل صداقت يې په قومونو څرګند کړے دے.

³هغهٔ خپله مینه او وفاداری چې د بنی اسرائیلو سره يې کړی وه راپه یاد کړله، زمونږ د خُدائ پاک خلاصُون ټولو د زمکې تر آخره پورې ولیدو.

⁴اے د زمکې ټولو خلقو، مالِک خُدائ ته خوشحالی وکړئ، د خوشحالئ په آوازونو او ساز سره ورته سندرې ووايئ،

⁵مالِک خُدائ ته د رباب ساز وغږوئ، او د رباب د ساز سره ورته سرودونه ووايئ،

⁶د بيګل او د ګډوری د ښکر په آوازونو، زمونږ د بادشاه مالِک خُدائ په حضُور کښې د خوشحالۍ نارې ووهئ،

⁷سمندر او هر څهٔ چې په کښې دى ټول دې چغې او نارې ووهی، ټوله دنيا او هر څهٔ چې په کښې اوسيږی،

⁸سيندونه دې لاسونه وپړقوی، ټول غرونه دې يو ځائ د خوشحالۍ سندرې ووایی،

⁹ټول دې د مالِک خُدائ په حضُور کښې سندرې ووایی، ځکه چې هغه د دنيا عدالت دپاره راځی، هغه به په صداقت سره د دنيا عدالت وکړی، او د ټولو خلقو به یو شان عدالت وکړی.