Read Pashto Bible (Yusufzai) — د پښتو مقدس کتاب زبور 99 Bible Online

زبور 99 - Pashto Bible (Yusufzai) — د پښتو مقدس کتاب bible

زبور 99

¹مالِک خُدائ بادشاه دے، د دنيا قومونه دې په لړزان شی. هغه چې د وزرو والا مخلوق په مينځ کښې په تخت ناست دے، نو زمکه دې په لړزیدو شی.

²مالِک خُدائ د صيون په ښار کښې عظیم دے، او هغه په ټولو قومونو باندې لوئ او اوچت دے.

³هغوئ دې ستا د لوئ او هیبتناک نوم ثناء صفت وکړی، ځکه چې ستا نوم پاک دے،

⁴او هغه قادر بادشاه دے څوک چې د اِنصاف سره مینه کوی. تا په خپله اِنصاف قائم کړے دے، تا د يعقوب سره هغه کار کړے دے څهٔ چې اِنصاف او صداقت دے.

⁵مالِک خُدائ، زمونږ د خُدائ پاک ثناء صفت وکړئ، او د هغهٔ د تخت د وړاندې عبادت وکړئ، ځکه چې هغه مقدس دے.

⁶موسىٰ او هارون د هغهٔ اِمامان وُو، سموئيل هم د دوئ سره شامل وو چې د مالِک خُدائ نوم به یې یادولو. هغوئ مالِک خُدائ ته سوال وکړو، او هغۀ يې سوال قبول کړو.

⁷هغۀ دوئ سره د وريځې د ستنې نه خبرې وکړې، هغوئ هغه ټول حُکمونه او قانون منلو کوم چې دوئ ته ورکړے شوی وُو.

⁸اے مالِکه خُدايه زمونږ پاکه خُدايه، د هغوئ سوال تا قبول کړو. تهٔ د بنی اِسرائيلو بخښونکے خُدائ پاک يی، که څهٔ هم تا د هغوئ بد عملونو ته سزا ورکړله.

⁹د مالِک خُدائ زمونږ د خُدائ پاک لويى بيان کړئ، په مقدس غر باندې د هغهٔ عبادت وکړئ، ځکه چې مالِک خُدائ زمونږ خُدائ پاک مقدس دے.