Read Pashto Bible (Yusufzai) — د پښتو مقدس کتاب متلونو 13 Bible Online

متلونو 13 - Pashto Bible (Yusufzai) — د پښتو مقدس کتاب bible

متلونو 13

¹هوښيار زوئ د خپل پلار تربيت قبلوى، خو يو جاهله انسان ملامتيا ته غوږ نهٔ نيسى.

²ښهٔ انسان د خپلې خولې د ميوې نه د ښۀ څيزونو خوند اخلى، خو د غدارانو زړونه د ظلم کولو خواهش کوى.

³څوک چې خپله ژبه په قابو کښې ساتى نو هغه خپل ژوند بچ کوى، خو چې څوک نهٔ ساتى نو هغه به تباه شى.

⁴يو ناراسته کس ډير څۀ غواړى خو څهٔ ورته نۀ ملاويږى، خو د محنت کوونکې خواهش تر سره کيږى.

⁵صادِقان د دروغو نه نفرت کوى، خو د بدعملو کارونه د بې شرمۍ او بې‌عزتۍ سبب کيږى.

⁶صداقت د نيکو خلقو لارې ساتى، خو شرارت بدعمله تباه کوى.

⁷يو انسان خپل ځان دا شان ښائى چې ګنې مالداره دے خو هيڅ هم نهٔ لرى، خو يو بل انسان خپل ځان غريب ښائى، خو په اصل کښې ډير زيات مالداره وى.

⁸د يو انسان مال دولت کيدے شى چې د هغهٔ د ژوند فديه ورکړى، خو غريب انسان ته خو څوک دهمکى قدرې هم نۀ ورکوى.

⁹د صادِقانو رڼا ډيره ځليږى، خو د بدعملو ډيوه په مړه کيدو ده.

¹⁰غرور صرف جنجال پيدا کوى، خو حِکمت په هغوئ کښې وى څوک چى نصيحت منى.

¹¹حرام مال دولت به زر ختم شى، خو هغه څوک چې په رو رو مال جمع کوى هغوئ به دا اضافه کړى.

¹²هغه اُميد چې په وخت پوره نهٔ شى نو زړۀ بيماروى، خو کوم خواهش چې پوره کيږى نو هغه د ژوندون ونه ده.

¹³څوک چې ښهٔ نصيحت ته سپک وګورى هغوئ به نقصانې شى، خو چې څوک د حُکم احترام کوى هغوئ ته به اجر مِلاو شى.

¹⁴د هوښيارانو تعليم د ژوند سرچينه وى، کوم چې انسان د مرګ د دامونو نه بچ کوى.

¹⁵ښۀ پوهه د انسان دپاره عزت پيدا کوى، خو د بې ايمانو لارې سختې وى.

¹⁶هر هوښيار سړے کار په حِکمت سره کوى، خو کم عقل د خپل جهالت اظهار کوى.

¹⁷يو بدعمله پيغام وړونکے په مصيبت کښې راګيريږى، خو اعتمادى پيغام وړونکے د شفا باعث جوړيږى.

¹⁸څوک چې تربيت نظر انداز کوى هغوئ به غريب او شرمنده شى، خو څوک چې نصيحت قبلوى هغه به عزتمند شى.

¹⁹کوم خواهش چى پوره شى نو دا روح دپاره ډير خوږ وى، خو کم عقل د بدکارئ د اوړيدو نه نفرت کوى.

²⁰څوک چى هوښيارانو سره ګرځى هغه هوښياريږى، خو د کم عقلو دوستانه نقصان ورکوى.

²¹مصيبت په ګناهګارو پسې روان وى، خو سوکالى د صادِقانو اجر دے.

²²يو ښهٔ انسان د خپل نسل دپاره ميراث پريږدى، خو د ګناهګارو مال دولت صادِقانو ته حواله کيږى.

²³د غريب سړى پټى به ډيره غله پيدا کوى، خو بې اِنصافى به دا هر څهٔ جارو کوى.

²⁴هغه څوک چى خپل زوئ نه د تربيت چوکه لرې ساتى هغه د هغهٔ نه نفرت کوى، خو هغه څوک چې ورسره مينه کوى هغوئ يې په تربيت ورکولو کښې احتياط کوى.

²⁵صادِقان په مړه خيټه ډودئ خورى، خو د بدعملو خيټه اوږى وى.