Read Pashto Bible (Yusufzai) — د پښتو مقدس کتاب متلونو 2 Bible Online

متلونو 2 - Pashto Bible (Yusufzai) — د پښتو مقدس کتاب bible

متلونو 2

¹زما زويه، که تۀ زما خبرې ومنې او زما حُکمونه په زړۀ کښې محفوظ کړې،

²او د عقل خبرو ته غوږ ونيسې او خپل زړهٔ د هوښيارتيا طرف ته مايل کړې،

³نو بيا د پوهې طلب کوه او د حِکمت دپاره په تېزه نارې ووهه.

⁴تۀ د دوئ داسې تلاش وکړه لکه د سپينو زرو چې کوې او يا يې داسې لټون وکړه لکه چې د پټې خزانې کوې.

⁵نو بيا به تهٔ د مالِک خُدائ په يره باندې پوهه شې او د خُدائ پاک علم به حاصل کړې.

⁶ځکه چې مالِک خُدائ عقل او حِکمت ورکوى، او د هغۀ د خلې نه علم او پوهه راوځى.

⁷هغه د نيکو خلقو دپاره د عقلمندۍ خزانې ساتى، هغه د هغه چا دپاره ډال دے د چا کردار چې بې داغه وى.

⁸هغه د اِنصاف کوونکو د لارو ساتنه کوى او هغه د خپلو نيکو خلقو حفاظت کوى.

⁹نو تهٔ به په دې پوهه شې چې څهٔ ښهٔ او د اِنصاف او مناسب دى. او تهٔ به د ژوند نېغه لار بيامومې.

¹⁰نو تهٔ به عقلمند شې او ستا علم او پوهه به ستا روح ته خوشحالى ورکړى.

¹¹تميز به په تا نظر ساتى او پوهه به ستا حِفاظت کوى.

¹²عقل به تا د بدکاره خلقو نه ساتى، او د هغوئ نه چې د چا خبرې چې غلطې دى،

¹³چا چې صحيح لاره پريښې ده او په تيارو کښې تلل کوى،

¹⁴څوک چې د خرابو کارونو په کولو خوشحاليږى او د بدعملو په شرارت خوشحالى کوى،

¹⁵او دغه کسان په کږو وږو سر دى او د هغوئ چال چلن د ټګئ دے.

¹⁶نو هغه به تا د بدکارې ښځې نه وساتى، د هغې زناکارې نه څوک چې په خوږو خبرو تا دوکه کول غواړى،

¹⁷چا چې خپل د ځوانۍ د وخت خاوند پريښے دے او خپل تړون يې هير کړو کوم يې چې د خُدائ پاک په وړاندې کړے وو.

¹⁸د هغې کور ته تلل مرګ ته دعوت دے، او د هغې د کور لار د قبر لار ده.

¹⁹څوک چې هغې له ورشى نو هغه بيا نهٔ راواپس کيږى او هغه بيا هيڅ کله د ژوند په لاره راتلے نهٔ شى.

²⁰نو بيا تهٔ د ښو خلقو په طريقو تلل کوه او د صادِقانو په لارو کښې پاتې شه.

²¹نو نېکان به په مُلک کښې اوسيږى، او بې داغه خلق به په کښې پاتې شى.

²²خو بدعمله به د هغه مُلک نه وشړلے شى، او غداران به ترې د بيخ نه وويستلے شى.