Read Pashto Bible (Yusufzai) — د پښتو مقدس کتاب متلونو 23 Bible Online

متلونو 23 - Pashto Bible (Yusufzai) — د پښتو مقدس کتاب bible

متلونو 23

¹کله چې تۀ يو حاکم سره روټۍ خوړلو ته کښينې، نو دا په ذهن کښې راوله چې ستا وړاندې څهٔ دى.

²په خپله مرئ چاړه کيږده که تهٔ زيات خوړونکے يې.

³د هغۀ د مزيدار خوراک ډير خواهش مه کوه، ځکه چې دا دوکه ورکونکے خوراک دے.

⁴خپل ځان په مالداره کولو مه ستړے کوه. دومره هوښيار شه چې د داسې کولو نه ځان ساتې.

⁵ستا دولت به د سترګو په رپ کښې فنا شى، او خپلې وزرې به پرانزې او د باز په شان به آسمان ته والوځې.

⁶د يو شوم سړى روټۍ مۀ خوره او د هغۀ د مزيدارو خوراکُونو آرمان مۀ کوه.

⁷هغه داسې سړے دے چې هميشه د خرچ سوچ کوى، هغه تاسو ته وائى چې، ”راشئ ما سره وخورئ وڅښئ.“ خو هغه د زړۀ نه دا خبره نۀ کوى.

⁸ځکه چې تاسو څۀ خوړلى وى هغه به په پوزه باقئ کړئ او ستاسو ټولې ښُکلې خبرې به بې فائدې شى.

⁹يو کم عقل ته خبرې مۀ کوه، هغه به ستا د حِکمت خبرې سپکې ګڼى.

¹⁰په زمکه کښې هغه د حد بندئ وړومبى کاڼې مۀ بې ځايه کوه او مه د يتيمانو په زمکه باندې قبضه کوه.

¹¹ځکه چې د هغوئ بچ کوُونکے زورور دے او هغه به ستاسو خِلاف د هغوئ د مقدمې طرفدارے وکړى.

¹²خپل زړهٔ تربيت ته حواله کړه او خپل غوږونه د حِکمت خبرو ته نيسه.

¹³د خپل اولاد تربيت مۀ پريږده. که تهٔ هغوئ ته په چوکه سزا ورکړې نو هغوئ به د دې نه مړهٔ نهٔ شى.

¹⁴هغهٔ ته په چوکه سزا ورکړئ او هغه به د عالم ارواح نه بچ کړئ.

¹⁵زما زويه، که تهٔ عقلمند يې، نو زما زړهٔ به خوشحاله وى.

¹⁶دننه روح به په ما کښې په ټوپونو شى کله چې تهٔ رښتيا خبرې کوې.

¹⁷خپل زړهٔ مۀ پريږده چې د ګناهګارو سره حسد وکړى، خو د مالِک خُدائ نه هر وخت په يره کښې اوسه.

¹⁸په يقين سره ستا دپاره په راتلونکې وخت کښې اُميد شته دے او ستا اُميد به نهٔ ختميږى.

¹⁹زما زويه، ما ته غوږ ونيسه، هوښيار اوسه، او خپل زړهٔ په صحيح لار باندې قائم وساته.

²⁰د شرابيانو سره ناسته پاسته مه کوه، او د خيټورو سره مه ګرځيږه.

²¹ځکه چې شرابيان او خيټور به غريبانان شى. او ډير خوب به هغوئ ته شليدلې جامې ورواغوندى.

²²خپل پلار ته غوږ نيسه، چا چې تا ته ژوند درکړے دے، او د خپلې مور بې‌عزتى مه کوه کله چې هغه بوډئ شى.

²³حقيقت حاصل کړه او دا مه خرڅوه، او حِکمت، تربيت او پوهه حاصله کړه.

²⁴د صادِق سړى پلار ډير خوشحاله وى، هغه څوک چې هوښيار زوئ لرى په هغهٔ باندې فخر کوى.

²⁵ستا مور او پلار دې خوشحالى وکړى، او هغه دې خوشحالى وکړى چا چې تهٔ زيږولے يې!

²⁶زما زويه، خپل زړهٔ ماته راکړه او ما ته وګوره او په خوشحالۍ سره زما په طريقو باندې عمل وکړه.

²⁷ځکه چې کنجره د ژورى کندې په شان وى او زناکاره د تنګ کوهى په شان وى.

²⁸هغوئ د ډاکوانو په شان په انتظار کښې ناستې وى او بې وفا سړى زياتوى.

²⁹څوک دى چې وير کوى؟ څوک دى چې غمژن دى؟ څوک دى چې جګړه کوى؟ څوک دى چې شکايت کوى؟ څوک دى چې هسې زخمونه لرى؟ څوک دى چې سرې سترګې لرى؟

³⁰دا هغوئ دى څوک چې په مےخانو کښې وخت تيروى، او د رنګا رنګ شرابو پيالۍ څښى.

³¹شرابو ته مه ګوره کله چې دا سرهٔ وى او کله چې په پياله کښې شغلې وهى او په آسانه سره تيريږى!

³²په آخر کښې دا لکه د مار چيچل کوى او لکه د منګور په شان زهريلا وى.

³³ستا سترګې به عجيبه او رنګا رنګ څيزُونه ګورى، او ستا ذهن به د ګډوډو څيزونو تصور کوى.

³⁴تۀ به په خيال کښې د هغه چا په شان يې څوک چې د سمندر دپاسه اودهٔ وى، او د چپو دپاسه پروت ټالئ وهى.

³⁵نو تۀ خپل ځان ته وائې، ”هغوئ زهٔ ووهلم، خو زهٔ خوږ نهٔ شوم، هغوئ زهٔ وټکولم، خو ما ته پته ونهٔ لګيدله! کله چې زهٔ راويښ شم نو زهٔ به د څښلو دپاره نور شراب هم پيدا کړم.“