Read Pashto Bible (Yusufzai) — د پښتو مقدس کتاب متلونو 4 Bible Online

متلونو 4 - Pashto Bible (Yusufzai) — د پښتو مقدس کتاب bible

متلونو 4

¹زما زامنو د خپل پلار هدايت ته غوږ ونيسئ. او هغې ته توجو ورکړئ او پوهه حاصله کړ‎ئ.

²ځکه چې زۀ تاسو ته ښۀ تعليم درښايم، نو زما تعليمات مه هيروئ.

³هر کله چې زهٔ د خپل پلار په کور کښې هلک وم، او د خپلې مور يک يو نيازبين زوئ وم،

⁴هغهٔ ماته تعليم راکړو او وې وئيل، ”په خپل ټول زړهٔ سره زما نصيحت راټينګ کړه، زما په حُکمونو عمل کوه نو ستا ژوند به په خير تير شى.

⁵حِکمت حاصل کړه، او پوهه حاصله کړه، زما خبرې مه هيروه او مه د هغې نه مخ اړوه.

⁶عقل ته مه شاه کوه، ځکه چې هغه به ستا حفاظت وکړى، د هغهٔ سره مينه کوه نو هغه به په تا باندې نظر ساتى.

⁷حِکمت حاصلول د ټولو نه اهم کار دے، د نورو څيزونو د حاصلولو سره سره پوهه هم حاصله کړه.

⁸د حِکمت عزت کوه او دا به تا لوئ کړى. دې ته غاړه ورکړه نو دا به تا عزتمند کړى.

⁹دا به ستا سر د فضل سهرې سره ښائيسته کړى او د شان او شوکت تاج به در په سر کړى.“

¹⁰زما زويه، ما ته غوږ شه! زهٔ چې درته څهٔ وايم هغه کوه، نو په دې کولو سره به ستا عمر اوږد شى.

¹¹ما درته د عقل او حِکمت لارښوونه وکړه او په نېغه لار مې روان کړې.

¹²کله چې تهٔ ګرځې نو ستا پښې به هيڅ څيز نهٔ منع کوى، او کله چې تهٔ منډه وهې نو تيندک به نهٔ خورې.

¹³زما نصيحتُونه راټينګ کړه او دا مۀ پريږده چې ستا نه لاړ شى. د هغوئ ښهٔ حفاظت وکړه ځکه چې دا ستا ژوندون دے.

¹⁴د شريرانو په لار کښې خپل قدم مه ږده او مۀ د بدکارانو په لار تلل کوه.

¹⁵د هغوئ لارو نه ځان وساته، د هغوئ په لار مه ځه، د هغوئ د لارو نه راوګرځه او په خپله لار روان اوسه.

¹⁶تر څو پورې چې دوئ غلط کار نهٔ وى کړے تر هغې خوب نهٔ ورځى، تر څو پورې چې دوئ چا ته تيندک نهٔ وى ورکړے نو دوئ تر هغې پورې آرام نهٔ کوى.

¹⁷هغوئ د شرارت روټۍ خورى او د فساد نه ډک شراب څښى.

¹⁸د صادِقانو لار د سحر د رڼا په شان ده، تر هغې ځليږى او لا نوره هم زياتيږى تر څو چې د ورځې رڼا نهٔ وى راښکاره شوى.

¹⁹خو د بدکارانو لار لکه د تورې تيارې په شان ده، دوئ په دې نهٔ پوهيږى چې په څهٔ باندې يې تيندک وخوړلو.

²⁰زما زويه، زهٔ چې درته څهٔ وايم هغې ته توجو ورکړه، او په غور سره زما خبرې واوره.

²¹دا د خپل نظر نه مه اوباسه او په خپل زړهٔ کښې يې دننه وساته.

²²نو دا به هغوئ ته ژوند ورکړى چې څوک يې پيدا کوى، او د هغوئ ټول وجود ته به صحت ورکړى.

²³د هر څهٔ نه اول د خپل زړهٔ خيال ساته، ځکه چې دا د ژوند د هدايت سرچينه ده.

²⁴د خپلې ‎‎‎‎‎‎‎‎خولې نه ټګى لرې کړه، او دوکه مارې خبرې د خپلو شونډو نه لرې کړه.

²⁵په غور سره مخامخ نېغ ګوره، او خپل نظر نېغ وساته.

²⁶او د خپلو قدمونو دپاره لاره هواره کړه، نو بيا به ستا ټوله لار مضبوطه وى.

²⁷ښې او ګس طرف ته مه تاويږه، او خپلې پښې د شرارت نه وساته.