Read Pashto Bible (Yusufzai) — د پښتو مقدس کتاب متلونو 5 Bible Online

متلونو 5 - Pashto Bible (Yusufzai) — د پښتو مقدس کتاب bible

متلونو 5

¹زما زويه، زما پوهې ته توجو ورکړه، او زما د حِکمت خبرو ته ښهٔ غوږ ونيسه.

²نو بيا به تهٔ تميز حاصل کړې، او ستا شونډې به علم او حِکمت محفوظوى.

³ځکه چې د زنا کارې ښځې د شونډو نه شات راڅاڅى. او د هغې خبرې د تيلو نه زياتې نرمې دى،

⁴خو په آخر کښې هغه د ګنډير په شان ترخه، او د دوه مخيزې تورې په شان تيره ده.

⁵د هغې پښې د مرګ په طرف روانې دى، او د هغې قدمونه سيدها د قبر طرف ته لارښوونه کوى.

⁶هغه د ژوند د لارې په حقله سوچ نهٔ کوى، د هغې لارې کږې وږې دى، خو هغه پرې نهٔ پوهيږى.

⁷نو بيا اوس زما زويه، ماته غوږ ونيسه. او زۀ چې درته څۀ وايم نو د هغې نه مه اوړه.

⁸د داسې ښځې نه ځان لرې ساته! او چې د هغې د کور دروازې ته هم ورنزدې نۀ شى

⁹هسې نه چې خپل عزت نورو ته ورکړې او بې‌عزته شې. او د خپل ژوند واګې د ظالمانو رحم و کرم ته وسپارې،

¹⁰هسې نه چې پردى ستا په مال مزې وکړى. او ستا د ژوند محنت د بل چا کور مالامال کړى.

¹¹او د خپل عمر په آخر کښې به تهٔ زبيرګى او فريادونه کوې، هرکله چې ستا غوښې او بدن خوړين شى،

¹²نو تهٔ به ووايې، ”ما د اصلاح نه څومره نفرت کولو! او څومره به زما زړهٔ اصلاح کول رټل،

¹³ما به د خپلو استاذانو تابعدارى نهٔ کوله، او نۀ به مې خپلو لارښوونکو ته غوږ نيولو.

¹⁴نو زهٔ د تباهۍ په غاړه ولاړ يم، او په ډيرو خلقو کښې وشرميدم.“

¹⁵د خپلې ذخيرې اوبۀ څښه، او صرف د خپلې ښځې سره کوروالے کوه لکه څنګه چې د خپل کوهى نه روانې اوبۀ څښې.

¹⁶دا مناسب ده چې ستا چينې په کوڅو کښې، او ستا د اوبو لختى په چوکونو کښې وبهيږى؟

¹⁷نو دا دې يواځې ستا وى، کله دې هم د پردو سره شريک نهٔ شى.

¹⁸ستا چينې دې برکتى شى، د خپلې ښځې سره خوشحاله اوسه چې ستا په ځوانۍ کښې ورسره وادهٔ شوے وو،

¹⁹چې هغه د يوې ښُکلې مينه ناکې او مهربانه هوسۍ په شان ده نو د هغې د بدن ښُکلا دې تا معمور کړى، او تهٔ دې هر وخت د هغې د مينې غلام يې.

²⁰زما زويه نو تهٔ دې ولې د يوې زناکارې ښځې په مينه کښې راګير يې؟ او تهٔ ولې د بل سړى د ښځې سره يو ځائ کيږې او غاړه غټئ کيږې؟

²¹نو د انسان په ټولو لارو د مالِک خُدائ نظر دے، او هغه په خپله د هغهٔ د ټولو لارو څارنه کوى.

²²د شرير شرارت هم د هغهٔ دپاره دام دے. او د هغهٔ د ګناه رسئ هغه کلک رانيسى.

²³هغه به د خپل تربيت د کموالى په وجه مړ شى، او د خپل کم عقلتوب په سبب بې لارې شوے دے.