Read Pashto Bible (Yusufzai) — د پښتو مقدس کتاب متلونو 6 Bible Online

متلونو 6 - Pashto Bible (Yusufzai) — د پښتو مقدس کتاب bible

متلونو 6

¹زما زويه، کۀ چرې تا د خپل ګاونډى دپاره په ضمانت کښې څهٔ ايښې وى، او يا تا د بل چا د قرض د ورکولو وعده کړې وى،

²که تهٔ چرې د خپلو خبرو په وجه په لټ کښې راګير شوے يې، او په دام کښې د خپلې خولې دلاسه راګير شوے يې،

³نو بيا زما زويه، په دې کولو سره تهٔ د خپل ګاونډى په لاسونو کښې پريوتې، نو د هغهٔ د دام نه د خلاصيدو دپاره، هغۀ له ورشه او خپل ځان کمزورے کړه او هغۀ ته مِنت زارى وکړه چې هغه تا د دې ذمه وارۍ نه آزاد کړى.

⁴زر ورشه مه اودهٔ کيږه او خپلې سترګې مرغۍ مرغۍ کيدو ته مۀ پريږده.

⁵نو خپل ځان لکه د هوسۍ په شان د ښکارى نه او لکه د مارغهٔ په شان خپل ځان د ښکارى د جال نه آزاد کړه.

⁶ناراسته خلقو ميږو ته وګورئ، او د هغوئ په چال چلن باندې غور وکړئ او هوښيار شئ.

⁷دوئ نۀ مشر لرى، او نۀ څوک افسر او نۀ حُکمران لرى،

⁸خو دوئ په اوړى کښې خپل خوراک راټولوى، او خپل ځان دپاره خوراک په لو کښې راجمع کوى.

⁹خو تهٔ ناراسته سړيه تر څو پورې به پروت يې؟ او تهٔ به کله د خوب نه راپاڅيږې؟

¹⁰تهٔ وائې، ”لږ وخت دپاره به اودۀ شم، او سترګې به پټې کړم، لږ به خپل لاسونه راغونډ کړم او آرام به وکړم.“

¹¹نو بيا به غريبى او نيستى د وسله بند ډاکُو په شان په تا باندې حمله وکړى.

¹²بدمعاشان او کمينه خلق، ټوله ورځ تش دروغ وائى.

¹³هغوئ سترګې وهى او ستا د دوکه کولو دپاره په پښو او ګوتو اشارې کوى،

¹⁴د هغوئ کاږهٔ زړونه خرابې منصُوبې جوړوى، نو دغه شان هغوئ هميشه په هر ځائ کښې سر خوږے پيدا کوى.

¹⁵نو په هم دې وجه په داسې کس باندې ناګهانې آفت راځى، او ناګهانه به هغه ټوټې ټوټې شى او بيا به د جوړيدلو نهٔ وى.

¹⁶شپږ څيزونه دى چې مالِک خُدائ ترې نه نفرت کوى بلکه اووۀ څيزُونه دى چې مالِک خُدائ هغه نۀ شى برداشت کولے:

¹⁷مغروره سترګې، دروغژنه ژبه، هغه لاسونه چې بې ګناه وينه تويوى،

¹⁸هغه زړهٔ چې بدې منصُوبې جوړوى، هغه پښې چې د شرارت طرف ته منډې وهى،

¹⁹دروغژن ګواه څوک چې دروغ وائى، او هغه کس چې د خاندان په مينځ کښې سرخوږے پيدا کوى.

²⁰زما زويه، د پلار په حُکمونو عمل کوه، او د خپلې مور لارښوونه مهٔ هيروه.

²¹د هغوئ خبرې تل دپاره په خپل زړهٔ کښې يادې ساته، او د هار په شان يې په خپله غاړه کښې ګرځوه.

²²هرکله چې تۀ روان يې نو هغه به ستا رهنمائى کوى، او کله چې اودهٔ يې نو هغه به ستا حفاظت کوى، هرکله چې راويښ شې، نو هغه به درته مشوره درکوى.

²³نو د هغوئ حُکمونه ډيوه ده او د هغوئ هدايت رڼا ده، او د هغوئ اصلاح د ژوندون لار ده.

²⁴دا به تا د بدکاره ښځو نه ساتى، او د زناکارو ښځو د نرمو خبرو نه به دې ساتى.

²⁵د هغوئ په ښائست خپل زړهٔ مه بائيله، او نۀ چې د هغې سترګې وهل تا راګير کړى.

²⁶يوه کنجره تهٔ د يوې روټۍ په قيمت اخيستے شى، خو د بل سړى د ښځې سره زنا به ستا د ژوند په قيمت وى.

²⁷څوک په خپله جولئ کښې بل شوے اور د کپړو سوزيدلو نه غير اوچتولے شى څهٔ؟

²⁸څوک په ګرمو سکروټو باندې بغير د پښو پولئ کيدو او سوزيدو نه ګرځيدلے شى څهٔ؟

²⁹نو دا کس هم د هغه چا په شان دے څوک چې د بل چا د ښځې سره څملى، څوک هم چې د هغې سره زنا کوى نو د سزا نه به خلاص نهٔ شى.

³⁰خلق هغه غل ته سپک نۀ ګورى څوک چې د خپلې لوږې د ختميدو دپاره غلا کوى،

³¹خو که هغه ګير شى، نو هغه به اووۀ چنده ورکوى، که څهٔ هم د هغهٔ د کور په ټول سامان يې قيمت پوره کيږى.

³²خو که يو سړے زنا کوى نو هغه بې حده کم عقل دے، ځکه چې هغه خپل ځان تباه کوى.

³³هغه به وهل وخورى او بې‌عزته به شى، او دا شرم به هيڅکله د هغهٔ نه اخوا نهٔ شى.

³⁴نو غيرت به يې د خاوند قهر راوپاروى او په بې رحمۍ سره به خپله بدله اخلى.

³⁵هغه به د دې په بدل کښې معاوضه نهٔ قبلوى او هغه به رشوت هم رد کړى که څومره ډير هم وى.