Read Pashto Bible (Yusufzai) — د پښتو مقدس کتاب متلونو 7 Bible Online

متلونو 7 - Pashto Bible (Yusufzai) — د پښتو مقدس کتاب bible

متلونو 7

¹زما زويه، زما خبرې ځان سره وساته او زما احکام خپل ځان سره حفظ کړه.

²زما په حُکمونو عمل کوه، نو تۀ به ژوندې پاتې شې. زما د تعليماتو دا شان حفاظت وکړه لکه څنګه چې د سترګې د ګاټى کوې.

³هغه د خپلو ګوتو سره ونښلوه او د خپل زړهٔ په تخته يې وليکه.

⁴حِکمت ته ووايه چې، ”تۀ زما خور يې،“ او پوهې ته خپل نزدې رشته دار ووايه.

⁵دوئ به تا د زناکارې ښځې سره د تعلق نه وساتى، او هم به دې دوئ د زناکارې ښځې د دوکه کوونکو خبرو نه وساتى.

⁶يو ځل ما د خپل کور د کړکۍ د جالۍ نه بهر وکتل،

⁷نو ما څهٔ ساده ځوانان وکتل، نو د دوئ په مينځ کښې مې يو کم عقل ځوان د نظر لاندې راغے.

⁸نو هغه د هغې د کور سره په نزدې کوڅه کښې روان وو، کومه لار چې د هغې کور ته تلې وه،

⁹د ماښام په وخت کښې، تيارهٔ خوره شوه او شپه شروع شوه.

¹⁰نو بيا يوه ښځه بهر راغله چې د هغهٔ سره مِلاو شى. هغې د کنجرتوب جامې اغوستې وې، او په غلط خيال سره چې هغه دوکه کړى.

¹¹هغه بې شرمه او بې حيا ښځه وه چې ټوله ورځ هوا ګيره ګرځيدله.

¹²هغه تل په کوڅو، او په چوکونو کښې ګرځى، او د ښار په هر ګوټ کښې ولاړه وى.

¹³هغې هغهٔ ته غاړه ورکړه او ښُکل يې کړو، او په خپلو بې شرمو سترګو سره يې هغهٔ ته ووئيل،

¹⁴”نن ما کره د قربانۍ غوښه ده او ما خپل نذر پوره کړو.

¹⁵نو زۀ بهر راووتلم چې تا سره مِلاو شم، ما ستا لټون کولو او تهٔ راته مِلاو شوې!

¹⁶ما په خپل کټ باندې د مِصر رنګا رنګ د لټې څادرونه اچولى دى.

¹⁷ما په خپل کټ باندې د مُر چيړ، عُود او دارچينئ خوشبو لګولې ده.

¹⁸راځه چې تر سحره پورې په مينه کښې ډُوب شو. او د يو بل د مينې نه خوند واخلو.

¹⁹ځکه چې زما خاوند په کور کښې نشته. هغه په لرې سفر باندې تلے دے.

²⁰هغهٔ خپل جيب د پيسو نه ډک کړے دے، او د دې مياشتې تر آخره به واپس نهٔ راځى.“

²¹نو په نرمو خبرو سره يې هغه غلط کړو، او د هغې پستو خبرو وغلولو.

²²نو هغه سمدستى هغې پسې د يو داسې غوَيى په شان روان شو لکه چې حلاليدو له روان وى، لکه چې هوسۍ په دام کښې ونښلى

²³ترڅو چې يو غشے د هغهٔ زړۀ غوڅ کړى. هغه د يو داسې مارغۀ په شان وو چې د دام طرف ته منډى وهى، هغۀ ته پته نۀ وى چې هغه به د ژوند نه لاس ووينځى.

²⁴نو بيا زما زامنو، ما ته غوږ ونيسئ، زۀ چې درته څۀ وايم نو هغې ته توجو وکړئ.

²⁵خپل زړهٔ ته اجازت مه ورکوه چې د داسې ښځې طرف ته مائيل شى، او يا د هغې په غلطو لارو روان شى.

²⁶هغه د ډيرو کسانو د تباهۍ سبب شوې ده او د بې شميره کسانو د مرګ سبب شوې ده.

²⁷د هغې کور د قبر طرف ته لار ده، او دا د مرګ دالان ته لارښوونه کول دى.