Read Pashto Bible (Yusufzai) — د پښتو مقدس کتاب مُعلِم 1 Bible Online

مُعلِم 1 - Pashto Bible (Yusufzai) — د پښتو مقدس کتاب bible

مُعلِم 1

¹دا د معلِم خبرې دى، چې د داؤد زوئ وو او د يروشلم بادشاه وو.

²هغه معلِم وائى، ژوند يو غټ راز دے، او زمونږ پوهه د دې په حقله ډيره محدوده ده.

³په مخ د زمکې خلق دومره خوارى کوى نو د دې نه دوئ تۀ فائده څۀ ده؟

⁴پيړئ په پيړئ تېرې شى، خو زمکه هميشه قائمه وى.

⁵نمر راوخېژى او پرېوزى او هغه ځائ ته زر زر بيا ځى چې د کوم ځائ نه راخېژى.

⁶هوا د جنوب طرف ته چلېږى، بيا تاو شى او د شمال طرف ته چلېږى، دا ګير چاپيره تاوېږى راتاوېږى او ځى راځى.

⁷ټول سيندونه سمندر ته بهېږى، خو سمندر ډک نۀ شو. ځکه چې د سيندونو اوبۀ د کوم ځائ نه بهيږې نو هم هلته مسلسل واپس راځى او بيا د هغه ځائ نه بهيږى.

⁸ټول څيزونه دومره د خوارئ ډک دى چې انسان يې بيانولے نۀ شى. نۀ سترګې په کتلو مړېږى، او نۀ غوږونه په اوريدو ډکيږى.

⁹څۀ چې مخکښې وُو دا به بيا هم وى، څۀ چې شوى دى هغه به بيا هم کيږى. په مخ د زمکې هيڅ هم نوى نشته.

¹⁰کله کله خلق وائى، ”ګوره! دا يو نوے څيز دے!“ خو اصل کښې دا زوړ وى، يو څيز هم په رښتيا نوے نۀ دے.

¹¹هيچا ته ياد نۀ دى چې په تېرو وختُونو کښې څۀ شوى وُو او څۀ چې اوس کيږى هغه به د راتلونکې وخت خلقو ته ياد نۀ وى.

¹²زۀ معلِم په يروشلم کښې د بنى اِسرائيلو بادشاه وم.

¹³ما پوره عقل سره تلاش شروع کړو چې زۀ به حکمت سره هغه هر څۀ وګورم او معلوم به يې کړم کوم چې په دنيا کښې شوى دى. نو زۀ دې نتيجې ته ورسيدم چې خُدائ پاک انسان له مشکل مشقت ذمه وارى ورکړې ده چې مصروف يې وساتى.

¹⁴ما هغه هر څۀ وليدل چې په مخ د زمکې شوى دى او زۀ تا ته وايم، چې دا هر څۀ بې معنې دى او هوا پسې منډې وهل دى.

¹⁵څۀ چې غلط دى هغه ټيک کيدے نۀ شى، او د څۀ چې کمے دے نو هغه پيدا کيدے نۀ شى.

¹⁶ما د خپل ځان سره ووئيل، ”زۀ د هغه ټولو نه ډېر زيات هوښيار يم چا چې زما نه مخکښې په يروشلم بادشاهى کړې ده. ما ډير حِکمت او علم حاصِل کړے دے.“

¹⁷ما خپل پوره ذهنى طاقت په دې ولګولو چې حِکمت وپېژنم، او هم په ليونتوب او بې وقُوفتوب پوهه شم، خو ما ته پته ولګېده چې دا ټول هم هوا پسې منډې وهل دى.

¹⁸ځکه چرته چې حِکمت زيات وى هلته پرېشانى هم زياته وى، او څوک چې علم زياتوى هغه غمونه زياتوى.