Read Pashto Bible (Yusufzai) — د پښتو مقدس کتاب يشعياه 17 Bible Online

يشعياه 17 - Pashto Bible (Yusufzai) — د پښتو مقدس کتاب bible

يشعياه 17

¹دا د دمشق په حقله پېغام دے: د دمشق ښار به تباه شى، او دا به تش د کنډرو يو ډېرے پاتې شى.

²د عروعير ښارونه به د همېشه دپاره په کنډرو بدل شى. دا به د ګډو او څاروو دپاره د څران زمکه وګرځى، چې هيڅ څوک به يې ترې نه نۀ شړى.

³د بنى اِسرائيل پاخۀ ښارونه به تباه شى او د دمشق بادشاهى به ختمه شى. کوم شاميان چې ژوندى پاتې وى نو هغوئ به د بنى اِسرائيلو په شان د شرم سره مخ شى. ما مالِک خُدائ، رب‌الافواج دا وئيلى دى.

⁴په هغه ورځ به د بنى اِسرائيل دبدبه ختمه شى او د دې مالدارى به په غريبۍ بدله شى.

⁵بنى اِسرائيل به د يو داسې پټى په شان وى چې غله ترې نه رېبلے شوې او راغونډه کړے شوې وى، دا به داسې وى لکه چې د رفائيم په وادۍ کښې يو پټے شاړ پروت وى او چې د دې نه هر څۀ وړلے شوى وى.

⁶خو صرف يو څو کسان به پاتې شى او بنى اِسرائيل به د زيتُونو د داسې ونې په شان وى چې د هغې نه ټول زيتُون راټول کړے شوى وى خو صرف دوه درې دانې يې په آخرى سر باندې او يا يو څو يې په لاندې څانګو کښې پاتې وى. ما مالِک خُدائ د بنى اِسرائيلو خُدائ پاک دا وئيلى دى.

⁷په هغه وخت به خلق په خپل خالِق باندې بهروسه کوى، او هغوئ به د بنى اِسرائيلو په مقدس ذات باندې منحصر وى.

⁸هغوئ چې په خپلو لاسونو کومې قربان ګاه جوړې کړې دى هغوئ به په دې باندې نور يقين نۀ ساتى، او د اشيرې بُت په نښو او د خوشبودارو مصالحو سوزولو په قربان ګاه باندې به يې اعتبار ختم شى.

⁹په هغه وخت به د هغوئ پاخۀ ښارونه شاړ ويجاړ شى او د هغه ښارونو په شان به په کنډرو بدل شى لکه څنګه چې حِويانو او اموريانو په هغه وخت کښې پرېښى وُو چې هغوئ د بنى اِسرائيلو نه تښتېدل.

¹⁰افسوس، تاسو خپل د خلاصُون خُدائ پاک هېر کړے دے او هغه مضبوط ګټ درته نۀ دے ياد چې تاسو پرې پناه اخستے شئ. خو تاسو د پردى مُلک د معبود د عِبادت دپاره ښائسته باغونه کَرلى دى.

¹¹خو چې کله تاسو کَرلى وى نو که هم په هغه سحر دا غوټۍ او ګلونه هم شى، نو هيڅ پېداوار به يې نۀ وى. تشه بيمارې او لاعلاجه درد به درته ملاوېږى.

¹²بې شميره قومونه د سمندر د شور په شان شور کوى، هغوئ داسې شور کوى لکه چې لوئې لوئې چپې په خپلو کښې جنګېږى.

¹³اګر که هغوئ د سمندر د تېزو چپو په شان شور کوى، خو خُدائ پاک به هغوئ خاموش کړى او هغوئ به وتښتې. هغوئ به داسې تښتې لکه څنګه چې هوا بوس زغلئ، يا څنګه چې دوړې په طوفان کښې الوځى.

¹⁴په ماښام کښې به بنى اِسرائيل سخت ويريږى، خو تر سحره به د هغوئ ټول دشمنان مړۀ وى. دا به د هغوئ قسمت او انجام وى چې څوک زمونږ د لوټ کولو کوشيش کوى.