Read Pashto Bible (Yusufzai) — د پښتو مقدس کتاب يشعياه 21 Bible Online

يشعياه 21 - Pashto Bible (Yusufzai) — د پښتو مقدس کتاب bible

يشعياه 21

¹دا پېغام د بابل په باره کښې دے، چې درياب سره په صحرا کښې دے. لکه څنګه چې په صحرا کښې تاوېدونکے باد چليږى داسې به آفت د صحرا راشى، او يروُونکے مُلک به درباندې حمله وکړى.

²ما د خرابو حالاتو په باره کښې يو رويا يعنې د ويښې خوب ليدلے دے، ما وکتل چې دوکه باز دوکې کوى او تباهکار تباهى کوى. اے د عيلام لښکره، حمله وکړه! اے د مادى لښکره، ښار محاصره کړه! د بابل په وجه چې کوم مصيبت راغلے دے نو خُدائ پاک به هغه ختم کړى.

³نو په دې وجه زۀ د يرې او درد سره مخ شوے يم، او دا درد داسې دے لکه چې ښځه يې د ماشوم د پېدا کولو په وخت لرى. زۀ چې څۀ اورم نو په ما بد لږى او چې څۀ ګورم نو يريږم.

⁴زما زړۀ په درزا دے او رپيږم. اول به ماښام په ما ډير ښۀ لږېدو خو اوس د تيارې نه زۀ يرېږم.

⁵ګورم چې لوئ خوراک تياريږى، د خلقو د کښېناستو دپاره قالينونه غوړېدلې دى. هغوئ خوراک څښاک کوى، ”پاڅئ، اے آفسرانو، خپل ډالونه تيار کړئ!“

⁶بيا مالِک خُدائ ما ته ووئيل، ”لاړ شه او يو محافظ ودروه او هر څيز چې هغه ګورى نو د هغې خبر به راوړى.

⁷چې څنګه هغه دؤو اسونو والا جنګى ګاډۍ وګورى يا په خرونو او اُوښانو باندې سوارۀ کسان ووينى، نو هغه دې ښۀ بېدار اوسى.“

⁸بيا څوکيدار آواز وکړو، ”مالِکه خُدايه، زۀ په خپل ځائ باندې د څوکيدارۍ دپاره شپه او ورځ ولاړ يم.

⁹اوس وګورئ! د دؤو اسونو والا جنګى ګاډۍ راروانه ده چې يو سړے پکښې سور دے.“ څوکيدار ووئيل، ”بابل ختم شوے دے! د بابل ټول بُتان ټوټې ټوټې شوى دى او په زمکه باندې خوارۀ وارۀ پراتۀ دى.“

¹⁰اے زما خلقو، تاسو د غنمو په شان په درمند باندې غوبل شوى يئ، خو اوس زۀ تاسو ته يو ښۀ زېرے اوروم چې ما د مالِک خُدائ رب‌الافواج نه اورېدلے دے، چې هغه د بنى اِسرائيلو خُدائ پاک دے.

¹¹دا پېغام د ادوم په باره کښې دے. د ادوم نه ما ته چا آواز وکړو، ”څوکيداره، دا شپه به کله تېرېږى؟ سحر ته څومره وخت پاتې دے؟“

¹²نو ما جواب ورکړو، ”سحر د راتلونکے دے، خو شپه به بيا راځى. که تۀ بيا تپوس کول غواړې، نو بيا راشه او تپوس وکړه.“

¹³دا پېغام د عربو په باره کښې دے. اے د ددان قافلو، د عربو په شاړ مُلک کښې شپه تيره کړئ.

¹⁴اے د تيما خلقو، کوم خلق چې تږى دى نو هغوئ له اوبۀ ورکوئ. او مهاجرو له خوراک ورکوئ،

¹⁵ځکه چې هغوئ د تُورو نه تښتى، او د داسې خلقو نه چې تُوره په لاس او تير کمان په غاړه د هغوئ سره سخت جنګيدلې وى.

¹⁶بيا مالِک خُدائ ما ته ووئيل، ”پوره په يو کال کښې دننه دننه به د قيدار شان او شوکت ختم شى.

¹⁷د قيدار صرف يو څو غشى او لينده چلاوُونکى سړى به پاتې شى. ما مالِک خُدائ، د بنى اِسرائيلو خُدائ پاک دا وئيلى دى.“