Read Pashto Bible (Yusufzai) — د پښتو مقدس کتاب يشعياه 22 Bible Online

يشعياه 22 - Pashto Bible (Yusufzai) — د پښتو مقدس کتاب bible

يشعياه 22

¹دا پېغام د رويا د وادۍ د يروشلم په باره کښې دے. څۀ شوى دى؟ دا ټول خلق ولې د کورونو چتُونو ته د خوشحالۍ دپاره خېژى؟

²ټول ښار بې قراره دے او د شور شرابې نه ډک دے. ستاسو مړى په تُوره نۀ دى قتل کړے شوى او نۀ په ميدانِ جنګ کښې مړۀ دى.

³ستاسو ټول مشران وتښتېدل او هغوئ لا يو غشے هم نۀ وو ويشتلے چې ونيولے شول. باقى خلقو هم د تښتيدو کوشيش وکړو خو هغوئ هم قيد کړے شول.

⁴ځکه ما ووئيل، ”ما پريږده چې په چغو چغو وژاړم. ما له د تسلۍ راکولو کوشش مۀ کوئ. ما پريږدئ چې د خپلو خلقو دپاره وژاړم، زۀ ګورم چې هغوئ تباه کيږى.“

⁵په حقيقت کښې مالِک خُدائ، رب‌الافواج دا وخت راوستے دے. د رويا په وادۍ کښې ګدوډى ده، خلق هيبتناکې منډې وهى او د هغوئ د ژړا چغې غرونو ته رسى.

⁶د عيلام د مُلک نه په اسونو سوارۀ فوجيان راغلل، چې کمان او غشى ورسره وُو. او د قير د مُلک فوجيانو خپل ډالونه راخستى وُو.

⁷د يهوداه بهترينې واديانې د جنګى ګاډو نه ډکې وې، په اسونو سوارۀ فوجيان د يروشلم د دروازو په مخکښې حملې دپاره ولاړ وُو.

⁸يهوداه چې د خپل تحفظ دپاره څومره بندوبست کړے وو هغه ختم شوے دے. په هغه ورځ تاسو څۀ وکړل؟ په هغه وخت کښې تاسو په هغه وسلحه باندې بهروسه وکړه کومه چې د ځنګل کور نومې ځائ کښې ساتلے شوې وه.

⁹۹‏-۱۰ په يروشلم کښې تاسو د هغه ځايُونو جائزه واخسته چرته چې دېوالونو مرمت غوښتو. تاسو په يروشلم کښې د ټولو کورونو معائنه وکړه او څۀ کورونه مو د دې دپاره راغورزول چې د ښار د دېوالونو د مرمت کولو دپاره ترې نه کاڼى واخلئ. د اوبو جمع کولو دپاره،

¹¹تاسو د ښار د ديوالونو په مينځ کښې د هغه اوبو رايسارولو دپاره تالاب جوړ کړو کومې اوبۀ چې د زوړ ډنډ نه رابهېدلې. خو تاسو خُدائ پاک ته هيڅ توجو ونۀ کړه، چې هغۀ ډېر د پخوا نه د دې هر څۀ منصُوبه جوړه کړې وه او هغۀ داسې وکړل.

¹²بيا مالِک خُدائ پاک رب‌الافواج تاسو ته آوازونه کول چې ژړا او ماتم کوئ، خپل سرونه کل کړئ او د ټاټ جامې واغوندئ.

¹³خو د هغې په ځائ، تاسو خندا او خوشحالى کوله. تاسو څاروى او ګډې حلالې کړې چې وې خورئ او تاسو شراب څښل. تاسو وئيل، ”مونږ له ښۀ خوراک څښاک په کار دے، ځکه چې سبا به مړۀ يُو.“

¹⁴مالِک خُدائ رب‌الافواج په خپله ما سره خبرې وکړې او راته يې ووئيل، ”تر څو پورې چې تاسو ژوندى يئ نو دا بد عمل به درته هيڅ کله معاف نۀ شى. ما، مالِک خُدائ پاک، رب‌الافواج دا وئيلى دى.“

¹⁵مالِک خُدائ پاک، رب‌الافواج ما ته ووئيل چې، ”شبنا له لاړ شه، چې هغه د شاهى کورَنۍ اِنتظام کوُونکے دے او هغۀ ته ووايه،

¹⁶تۀ دلته څۀ کوې؟ تا له دلته د خپل قبر جوړولو اجازت چا درکړے دے؟ تۀ څوک يې چې دلته به د ځان دپاره په اوچت ځائ کښې مزار جوړ کړې او په ګټ کښې د ځان دپاره قبر جوړ کړې؟

¹⁷اے سړيه، مالِک خُدائ به دې راونيسىى او لرې به دې وغورزوى.

¹⁸هغه به تا د پنډُوس په شان ګول مول کړى او يو بل لوئ مُلک ته به دې وغورزوى. او تۀ به هلته مړ شې، او ستا ښائسته جنګى ګاډۍ به هم هلته پرتې وى. ولې چې تۀ د خپل نېک د کورَنۍ دپاره د بې‌عزتۍ سبب جوړ شوے يې.

¹⁹مالِک خُدائ فرمائى، زۀ به تا د خپلې عُهدې نه لرې کړم او د خپل اُوچت مقام نه به دې راکُوز کړم.

²⁰په هغه ورځ به زۀ خپل خِدمتګار د خلقياه زوئ اِلياقيم راوغواړم.

²¹زۀ به هغۀ ته ستا سرکارى چُوغه او کمربند ورواچوم او تا چې کوم اِختيارات لرل نو هغه ټول به هغۀ له ورکړم. هغه به د يروشلم او د يهوداه د خلقو د پلار په شان وى.

²²زۀ به هغۀ له د داؤد د کورنئ چابيانې ورکړم. چې کومه دروازه هغه کولاو کړى هغه به څوک بندولے نۀ شى او چې کومۀ دروازه هغه بند کړى هغه به څوک کولاوولے نۀ شى.

²³زۀ به هغۀ يوه لويه مرتبه ورکړم لکه څنګه چې په ديوال کښې مېخ کلک لږېدلے وى، او دا به د هغۀ د کورَنۍ دپاره د عزت سبب وګرځى.

²⁴بيا به د هغۀ د پلار د کورنئ ټول وزن په هغۀ باندې راځوړند شى. او د هغۀ ټول اولاد او خپلوان به د لوښو په شان د وړې پيالۍ نه واخله تر غټ مرتبان پورې به دې ميخ پورې راځوړند وى!

²⁵رب‌الافواج ووئيل، يو وخت به راشى چې دا کلک لګيدلے مېخ به راوغورزېږى او چې په دې باندې څۀ هم راځوړند وى نو هغه به مات شى. مالِک خُدائ دا وئيلى دى.“