Read Pashto Bible (Yusufzai) — د پښتو مقدس کتاب يشعياه 25 Bible Online

يشعياه 25 - Pashto Bible (Yusufzai) — د پښتو مقدس کتاب bible

يشعياه 25

¹اے مالِکه خُدايه، تۀ زما خُدائ پاک يې، زۀ به ستا درناوے کوم او ستا د نوم ثناء صِفت به کوم. تا عجيبه عجيبه کارونه کړى دى، تا چې ډېر پخوا کومې منصُوبې جوړې کړې وې، تا بې شکه هغه د وفادارۍ سره پوره کړې دى.

²تا ښارونو نه د ملبو ډيرى جوړ کړى دى، او د هغوئ د پَخو دېوالونو قلعې دې په کنډراتو بدل کړى دى. د پردې مُلک د خلقو د قلعې په شان محلونه داسې خاورې شوى دى چې بيا به هيڅ کله ورته ښار ونۀ شى وئيلے او نۀ به کله دوباره آباد کړے شى.

³نو په دې وجه د تکړه قومونو خلق به ستا ثناء صِفت کوى، او د ظالِمانو قومونو په ښارونو کښې به ستا نه يره کېږى.

⁴تۀ د غريبانانو حفاظت کوؤنکے يې، او د مصيبت په وخت کښې د ضرورت مندو حِفاظت کوونکے يې. تا هغوئ له د طوفانونو نه پناه ورکړې ده، او د سوزوُونکې ګرمۍ نه دې سورے ورکړے دے. د ظالِمانو پوکى لکه د ژمى د طوفانى باران په شان وى،

⁵لکه د صحرا د ګرمۍ په شان دى. تا د پردى مُلک خلق غلى کړى دى. تا د ظالِمانو خلقو آوازونه داسې خاموش کړى دى، لکه چې وريځې سخته ګرمى يخوى.

⁶د صِيون په غرۀ به مالِک خُدائ رب‌الافواج د دنيا د ټولو قومونو دپاره يوه مېلمستيا وکړى، دا مېلمستيا به د ښې غوښې او د انګورو د ښو شرابو وى.

⁷نو په دې غر به هغه د خلقو نه د مرګ سورے ختم کړى، کوم سورے چې د ټولو قومونو دپاسه ولاړ دے.

⁸مالِک خُدائ پاک به مرګ د همېشه دپاره ختم کړى! او د هر يو کس په مخ باندې به اُوښکې اوچې کړى او د ټولې دنيا نه به د خپلو خلقو بې‌عزتى لرې کړى. مالِک خُدائ په خپله دا وئيلى دى!

⁹په هغه وخت به هغوئ وائى، ”وګورئ دا دے زمونږ خُدائ پاک! مونږ د هغۀ په انتظار وُو او هغۀ مونږ آزاد کړُو. دا دے هغه مالِک خُدائ د چا چې مونږ په انتظار وُو! راځئ چې د هغۀ په خلاصون باندې د خوشحالۍ جشن وکړُو!“

¹⁰مالِک خُدائ به د صِيون د غرۀ حِفاظت کوى، خو موآب به داسې راوغورزېږى لکه چې بوس په ډېران کښې ورَکېږى.

¹¹خُدائ پاک به موآب داسې دباو کړى لکه څنګه چې لامبوزن اوبۀ خپلو لاسونو سره لاندې ديکه کوى، هغه به د دوئ غرور او د دوئ ټول بد کارونه ختم کړى.

¹²هغه به د موآب د اُوچتو اُوچتو دېوالونو والا قلعې تباه کړى او راوبه يې غورزوى او د خاورو سره به يې خاورې کړى.