Read Pashto Bible (Yusufzai) — د پښتو مقدس کتاب يشعياه 30 Bible Online

يشعياه 30 - Pashto Bible (Yusufzai) — د پښتو مقدس کتاب bible

يشعياه 30

¹مالِک خُدائ وئيلى دى: ”اے باغيانو بچو په تاسو افسوس! ځکه چې تاسو په هغه منصُوبو باندې کار کوئ چې کومې زما نۀ دى، او زما د مرضۍ خِلاف معاهدې کوئ او تاسو ګناهونو پسې ګناهونه کوئ.

²تاسو زما د مشورې نه بغېر د مدد دپاره مِصر ته لاړئ. تاسو غوښتل چې مِصريان مو بچ کړى، نو په دې وجه تاسو د مِصر په فِرعون باندې يقين وکړو.

³خو په فِرعون باندې اعتماد سره به تاسو رسوا شئ او په هغۀ باندې بهروسې سره به تاسو بې‌عزته شئ.

⁴اګر چې د هغۀ افسران ضُعن کښې دى او د هغۀ سفيران حنيس ته رسېدلى دى،

⁵هغه ټول چې په هغۀ بهروسه کوى هغوئ به وشرميږى. او هغه به ستاسو مدد نۀ کوى بلکه په ځائ د دې به ستاسو بې‌عزتى وکړى.“

⁶د جنوبى صحرا د ځناورو په حقله د خُدائ پاک پېغام دا دے: هغه سفيران به په داسې خطرناک مُلک کښې سفر کوى، چرته چې ازمرى اوسېږى او چرته چې تور ماران او نور زهرژن ماران دى. هغوئ د يو داسې قوم دپاره خپل خرونه او اُوښان د قيمتى تُحفو نه بار کړى دى څوک چې د دوئ هيڅ مدد نۀ شى کولے.

⁷د مِصر نه چې کوم مدد ملاوېږى نو هغه بې فائدې دے. نو ځکه ما په مِصر باندې يو بل نوم ”بې ضرره اژدها“ ايښے دے.

⁸اوس لاړ شه او دا الفاظ په يو کِتاب کښې وليکه. چې دا د راروانو وختُونو دپاره د هميشه دپاره يوه ګواهې شى.

⁹ځکه چې دا قوم سرکش دے او دا همېشه دروغ وائى او د خُدائ پاک تعليمات منلو ته تيار نۀ دى.

¹⁰هغوئ رويا کتونکو ته وائى چې، ”تاسو روياګانې مۀ وينئ،“ پېغمبرانو ته وائى، ”مونږ ته د هغه څۀ په باره کښې خبرې مۀ کوئ چې څۀ حقيقت وى. مونږ ته د خوند خبرې کوئ، خېر دے که هغه دروغ هم وى.

¹¹زمونږ د لارې نه اخوا شئ او زمونږ مخه مۀ نيسئ. مونږ ستاسو د بنى اِسرائيلو د مقدس ذات په باره کښې اورېدل نۀ غواړُو.“

¹²ځکه خو د بنى اِسرائيلو مقدس ذات داسې وائى، ”زۀ چې څۀ درته وايم نو تاسو هغه رد کړئ او د ظلم زياتى او دوکې نه کار اخلئ.

¹³دا ګناه به ستاسو دپاره د يو داسې اُوچت دېوال په شان وى چې چاودے او کوږوالے پکښې راغلے وى او ديوال کينوى او بيا سمدستى يو درز سره زمکې ته راګزار شى.

¹⁴دا ټوټې ټوټې شى د خټې د هغه لوښى په شان چې ټکړې ټکړې کړے شوى وى او د هغې يوه ټوټه به هم دومره نۀ وى چې په هغې کښې بل سکارۀ راواخستلے شى، يا په کښې د ډيګۍ نه اوبۀ راوويستلے شى.“

¹⁵قادر خُدائ د بنى اِسرائيلو مقدس ذات، خلقو ته وائى، ”راواپس شئ او په ما باندې پوره يقين ولرئ. نو تاسو به تکړه او محفوظ يئ.“ خو تاسو داسې نۀ کوئ!

¹⁶خو ستاسو منصُوبه دا ده چې په تېزو اسونو باندې سوارۀ شئ او د خپل دشمن نه وتښتئ. تاسو صحيح يئ، ځکه چې تاسو به تښتئ! ستاسو خيال دا دے چې ستاسو اسونه ښۀ تېزه منډه وهلے شى، خو چې څوک درپسې وى نو هغوئ به ستاسو نه تېز وى!

¹⁷که ستاسو د دشمن يو فوجى دهمکى درکړى نو ستاسو زر کسان به منډې وهى، او که پينځۀ سپايان دهمکى درکړى نو دا به ستاسو ټولو زغلولو دپاره کافى وى. او که په آخر کښې څوک پاتې شى نو هغوئ به د غرۀ په سر باندې د جنډې د يو لرګى په شان يواځې وى!

¹⁸خو مالِک خُدائ بيا هم په دې انتظار کښې دے چې په تاسو باندې رحم وکړى. هغه په تاسو باندې د رحم کولو دپاره تيار دے ځکه چې هغه وفادار خُدائ پاک دے. بختور دى هغوئ چې د هغۀ د مدد په انتظار کښې وى.

¹⁹اے د يروشلم خلقو تاسو به نور نۀ ژاړئ. کله چې تاسو هغۀ ته د مدد دپاره فرياد وکړئ، نو هغه به خامخا په تاسو رحم وکړى او چې څنګه ستاسو دعاګانې واورى نو جواب به درکړى.

²⁰اګر چې مالِک خُدائ به تاسو ته د تنګ لاس روټئ او د تکليف اوبۀ درکړى، خو هغه به په خپله ستاسو استاذ وى او تاسو ته به نور د هغۀ د لټولو ضرورت نۀ پښېږى.

²¹که تاسو د لارې نه ښى يا ګڅ طرف ته واوړئ، نو د وروستو نه به ستاسو لار ښودنه کيږې چې، ”دا لاره صحيح ده، په دې روان شئ.“ تاسو به په خپلو غوږونو دا اورئ.

²²نو بيا به تاسو خپل هغه بُتان چې په سرو زرو پټ وى او هغه بُتان چې په سپينو زرو پټ وى هغه به واخلئ او وايئ به چې، ”دا څۀ ګند دے!“ او بهر په ډيران به يې ګزار کړئ.

²³کله چې تاسو تخم وکَرئ، نو مالِک خُدائ به د دې شين کېدو دپاره باران راولېږى او د دې نه به تاسو ته ښۀ او زيات پېداوار مِلاو شى او ستاسو د څاروو دپاره به د څران ښۀ ډېره زمکه وى.

²⁴کوم غوَيى او خرونه چې ستاسو په پټو کښې يَوې کوى نو هغه به هم هغه خوراک کوى چې چج او درې غاښئ سره صفا شوے وى.

²⁵په هغه ورځ کله چې ستاسو د دشمن قلعې قبضه شى او د هغوئ خلق ووژلے شى، نو د هر غرۀ نه او د هرې غونډۍ نه به د اوبو وَلې رابهېږى.

²⁶سپوږمۍ به د نمر په شان ځلېږى او نمر به په اووۀ چنده زيات روښانه شى، دا به داسې وى لکه چې د اوو ورځو رڼا يو ځائ شى. دا به په هغه وخت کښې وشى کله چې مالِک خُدائ د خپلو خلقو د هغه زخمونو مرهم پټۍ وکړى او هغه زخمونه ورله روغ کړى چې کوم زخمونه هغۀ ورکړى دى.

²⁷وګورئ د مالِک خُدائ نوم د لرې ځائ نه راروان دے. هغه لوئ غضب او رُعب داب سره رانزدې کيږى. د هغۀ شونډې د غصې نه ريږدى، او د هغۀ وينا لکه د اور هر څۀ ايرې ايرې کوى.

²⁸د هغۀ ساه لکه د سيلاب په شان ده چې هر څۀ تر مرئ مرئ ډوبوى. هغه به مغروره قومونه د تباهۍ دپاره چاڼ کړى. هغه به دوئ قابو کړى او د بربادئ په طرف به يې يوسى.

²⁹خو اے د خُدائ پاک خلقو، تاسو به خوشحاله يئ او داسې سندرې به وايئ لکه څنګه سندرې چې د مقدس اختر په شپه وئيلے شى. تاسو به د هغه خلقو په شان خوشحاله يئ کوم چې د مالِک خُدائ کور ته د شپېلۍ د ساز سره روان وى، چې هغه د بنى اِسرائيلو حِفاظت کوُونکے دے.

³⁰مالِک خُدائ به په هر يو کس باندې خپل پرجلاله آواز واورى او د خپلې غصې زور به ورته وښائى. هلته به د اور لمبې، تندر، ږلۍ او دروند باران وى.

³¹کله چې اسوريان د مالِک خُدائ آواز واورى او د هغۀ د سزا پته ورته ولګى نو هغوئ به ويريږى.

³²کله چې مالِک خُدائ هغوئ بار بار ووهى، نو د هغۀ خلق به هر ځلې د منګى او بينجو ساز ورسره غږوى. خُدائ پاک به پخپله د اسوريانو خِلاف جنګ کوى.

³³ډېره موده مخکښې يو ځائ تيار شوے وو چرته به چې يو لوئ اور د اسور بادشاه سوزوى. د لرګو يو اُوچت ډېرے به وى. مالِک خُدائ به د نِهر په شان د سوزيدونکو ګوګړو يوه لمبه پو کړى او دې له به اور ورکړى.