Read Pashto Bible (Yusufzai) — د پښتو مقدس کتاب يشعياه 32 Bible Online

يشعياه 32 - Pashto Bible (Yusufzai) — د پښتو مقدس کتاب bible

يشعياه 32

¹ګورئ، يو بادشاه به د اِنصاف سره حُکمرانى کوى. او د هغۀ افسران به هم اِنصاف سره حکمرانى کوى.

²د بادشاه هر يو کس به د سيلۍ نه د حِفاظت، او د طوفان نه د پټېدو د ځائ په شان وى. هغوئ به د داسې نِهر په شان وى چې په صحرا کښې بهېږى او هغوئ به په خُشک مُلک کښې د لوئ ګټ د سورى په شان وى.

³نو بيا چې د چا سترګې وى نو هغوئ به حقيقت وينى، او چې د چا غوږونه وى نو هغوئ به د اوريدو جوګه وى.

⁴څوک چې د بې صبرۍ نه کار اخلى هغوئ به هوښيار شى، او چاړاګان به صفا او روانئ سره خبرې کوى.

⁵څوک به دا نۀ وائى چې کم عقل کس عزتمند وى او يا بدعمله کس نېک وى.

⁶يو کم عقل کس د کم عقلتوب خبرې کوى او د بدعملۍ کولو منصُوبې جوړوى. هغه د بې دينئ خبرې کوى او د مالِک خُدائ خلاف کفر وروى. هيڅ کله اوږو خلقو له خوراک نۀ ورکوى او تږى د څۀ څښلو نه محرومه ساتى.

⁷کم عقل کس بدعمله وى او د بدعملۍ کارونه کوى، هغه د دروغو سره د غريب د تباه کېدو منصُوبې جوړوى اګر که حاجت مند په حقه هم وى.

⁸خو عزتمند سړے د صداقت سره کار کوى او چې کوم کار صحيح وى نو په هغې باندې کلک ولاړ وى.

⁹اے هغه ښځو، څوک چې په آرام سره ژوند تېروئ زما خبره واورئ! اے بې پرواه لوڼو زما خبره په غور سره واورئ!

¹⁰يو کال او څو ورځې پس به تاسو بې پروا ښځې په لړزان شئ، ځکه چې د انګورو فصل به ضايع شى او ميوې به هيڅ کله نۀ پخيږى.

¹¹اے هغه ښځو، څوک چې په آرام سره ژوند تېروئ، د يرې نه ولړزېږئ! اے بې غمه لوڼو د يرې نه ورپيږئ! خپلې کپړې وباسئ بربنډ شئ او د ټاټ جامې واچوئ.

¹²د زرخېزه پټو او د انګورو باغونو دپاره د خفګان نه خپلې سينې وهئ.

¹³زما د خلقو په مُلک کښې د ازغو او غنو بوټى راشنۀ شوى دى. ستاسو د کورونو خندا او د ښارونو خوشحالى به ختمه شى.

¹⁴محل به خوشے پاتې شى او مرکزى ښار به خالى شى. د کورونو او قلعو نه به د هميشه دپاره کنډرات جوړ شى، چرته به چې ځنګلى خرونه ګرځى او ګډې به په کښې څرېږى.

¹⁵تر څو چې خُدائ پاک خپل روح په مونږ باندې نازل نۀ کړى نو تر هغه وخته پورې به حالات هم داسې وى. خو بيا به هغه خوشے مُلک آباد شى او د باغ ميوه دارىې ونې به يې لکه د ځنګل په شان ګڼې وى.

¹⁶نو بيا به اِنصاف په صحرا کښې استوګنه کوى، او صداقت به په ميوه دار باغ کښې اوسيږى.

¹⁷د صداقت اثر به سلامتې وى، او نتيجه به يې ابدى سکون او حفاظت وى.

¹⁸زما خلق به پرسَکون او محفوظ ځايونو کښې اوسيږى، او د هغوئ کورونه به د آمن او سلامتۍ نه ډک وى،

¹⁹اګر که ځنګل تباه شى او ښار مکمل برباد شى.

²⁰خو بختور يئ تاسو چې د ټولو اوبو په غاړه به فصلونه وکرلے شئ او په آزادئ سره به خپل خرونه او څاروى وڅرولے شئ.