Read Pashto Bible (Yusufzai) — د پښتو مقدس کتاب يشعياه 34 Bible Online

يشعياه 34 - Pashto Bible (Yusufzai) — د پښتو مقدس کتاب bible

يشعياه 34

¹اے د ټولو قومونو خلقو، راشئ! راغونډ شئ او واورئ. په ټوله دنيا کښې چې څوک هم اوسېږى نو هغه دې دلته راشى او وا دې ورى.

²مالِک خُدائ ټولو قومونو او د هغوئ ټولو لښکرو ته غصه دے او هغه به دوئ په مکمل طور تباه کړى او ذبح به يې کړى.

³خو د هغوئ لاشونه به نۀ ښخېږى او هلته به پراتۀ وى چې سخا شى او خراب بوئ وکړى، او غرونه به په وينو باندې سرۀ وى.

⁴په آسمان کښې ستورى به فنا شى. آسمان به داسې فنا شى لکه چې طومار راغونډولے شى او ستورى به داسې راوغورزېږى لکه د انګورو د بوټى نه اوچې پاڼې يا د اينځر د ونې نه اوچ اينځر راغورزېږى.

⁵او زما تُورې خپل کار په آسمان کښې پوره کړے دے، او ګورئ اوس به دا په ادوم نازله شى، په هغه قوم کوم چې ما د تباهۍ دپاره په نښه کړے دے.

⁶د مالِک خُدائ تُوره په وينه او وازږه باندې پټه شوې ده، دا د ګډُورو او د چېلو په وينو باندې سره ده او وازګې ورباندې لګيدلې دى، ولې چې مالِک خُدائ به دا قربانى د بصرا په ښار کښې پېش کړى، هغه به دا لويه حلاله د ادوم په مُلک کښې وکړى.

⁷خلق به د ځنګلى غوَيى او د څخو په شان راوغورزېږى او زمکه به په وينه سره وى او په وازګه به پټه وى.

⁸دا هغه ورځ ده چې مالِک خُدائ به بدل واخلى، هغه کال چې د ادوم نه به د بنى اِسرائيل بدله واخلى.

⁹د ادوم سيندونه به په تارکولو بدل شى، خاوره به يې په ګوګړو بدله شى. ټول مُلک به د تارکولو په شان اور اخستے وى.

¹⁰دا به شپه او ورځ بلېږى او د دې نه به همېشه لوږے خېژى. هغه مُلک به په هره زمانه کښې خوشے پروت وى اَن تر دې چې څوک مسافر به هم تر هميشه پورې په دې کښې سفر نۀ کوى.

¹¹ګونګاګان او ځنګلى ځناور به دا قبضه کړى، هر قِسمه ځنګلى مارغان به په دې کښې پاتې کيږى. مالِک خُدائ به په خيال سره د دې مُلک ناپ تول وکړى، هغه به دا ناپ تول د دې د تباهۍ دپاره وکړى.

¹²هلته به د بادشاهۍ هيڅ هم پاتې نۀ وى، او د هغې ټول مشران به ختم شى.

¹³د ازغو بوټى او تراخۀ بوټى به هر ځائ کښې د پَخو دېوالونو په ښارونو کښې او قلعو کښې خوارۀ شى او ګيدړان او ګونګاګان به په دې کښې اوسېږى.

¹⁴ځنګلى ځناور او ګيدړان به هلته راغونډ شى او د چيلو په شکل پېريان به په کښې يو بل ته آوازونه کوى. د شپې بلا به هلته راځى چې د آرام ځائ پېدا کړى.

¹⁵ګونګاګان به هلته جالې جوړوى، هګۍ به اچوى، بچى به ترې نه راوباسى او وزرو لاندې به يې پټوى، او ساتنه به يې کوى. ټپوسان به هلته راغونډېږى او هر يو سره به خپله ماده وى.

¹⁶د مالِک خُدائ کِتاب وګورئ او په هغې کښې لټون وکړئ چې څۀ وائى. په دې کِتاب کښې د دې ټول مخلوق نومونه موجود وى او يو به هم په کښې بې جوړې نۀ وى. مالِک خُدائ حُکم کړے دے چې هم دغه شان دې وشى، د هغۀ روح به يې پخپله په يو ځائ باندې راغونډ کړى.

¹⁷دا به مالِک خُدائ وى چې په دې ځناورو باندې مُلک تقسيم کړى او هر يو له خپله برخه ورکړى. هغوئ به نسل په نسل په هغه مُلک کښې اوسېږى او د همېشه دپاره به د هغوئ شى.