Read Pashto Bible (Yusufzai) — د پښتو مقدس کتاب يشعياه 45 Bible Online

يشعياه 45 - Pashto Bible (Yusufzai) — د پښتو مقدس کتاب bible

يشعياه 45

¹مالِک خُدائ خپل غوره کړے شوى خادم خورس ته وائى، ”ما ستا ښے لاس نيولے دے، نو ځکه چې تۀ هر چرته ځې هلته به قومونه ستا تابع شى، د بادشاهانو زور به ختميږى د ښارونو دروازې به ستا دپاره کولاويږى او بنديږى به نه.

²زۀ به په خپله ستا نه وړاندې ځم، او غرونه به درته هوار کړم. زۀ به د زېړو دروازې راوغورزوم او د دې د اوسپنې سيخُونه به ټوټې ټوټې کړم.

³زۀ به تا له د تورې تيارې او د پټو ځايونو نه خزانې درکړم، نو بيا به تا ته پته ولګى چې زۀ مالِک خُدائ يم، او چې د بنى اِسرائيلو خُدائ پاک يم څوک چې تا ته په نوم آواز کوى.

⁴زما د خِدمت کوُونکو او غوره کړے شوؤ بنى اِسرائيلو د خاطره، زۀ تا ته په نوم آواز کوم او تا له مې د لوئ عزت لقب درکړے دے، اګر چې تۀ ما نۀ پېژنې.

⁵زۀ مالِک خُدائ يم، بل يو خُدائ هم نشته. زۀ تا له طاقت درکوم، اګر چې تۀ ما نۀ پېژنې.

⁶دا زۀ د دې دپاره کوم چې د دنيا د يو سر نه تر بل سره پورې هر چا ته پته ولګى چې زۀ مالِک خُدائ يم او بل يو خُدائ هم نشته.

⁷زۀ رڼا او تيارۀ دواړه پېدا کوم، سلامتى او بربادى دواړه زۀ راولم. زۀ، مالِک خُدائ دا هر څۀ کوم.

⁸اے آسمانه باران اوورَوه او زمکه تازه کړه! اے وريځو، صداقت راورَوئ! زمکه دې دا جزب کړى چې خلاصون راوشى او دې سره صداقت هم راوشى. ما، مالِک خُدائ دا پېدا کړى دى.“

⁹په هغۀ باندې افسوس چې د خپل خالق سره جګړه کوى، هغه داسې دے لکه چې د ماتو لوښو يو ټيکرے وى. ولې خټه د کُلال نه تپوس کوى څۀ چې، ”تۀ څۀ جوړوې؟“ ولې ستا کوم جوړ شوے څيز ستا په حقله شکايت کوى څۀ؟ د هغۀ هيڅ اختيار نشته.

¹⁰په هغۀ باندې افسوس چې خپل پلار ته وائى چې، ”زۀ دې ولې پېدا کړم؟“ يا خپلې مور ته ووائى چې، ”تا ولې زۀ داسې جوړ کړم؟“

¹¹مالِک خُدائ، د بنى اِسرائيلو مقدس ذات، کوم ذات چې هغوئ پېدا کړى دى، هغه وائى، ”تاسو څنګه زما د بچو په حقله ما نه تپوس کولے شئ؟ څۀ چې ما جوړ کړى دى د هغې په حقله تاسو څنګه ما له حُکم راکولے شى؟

¹²زۀ هغه ذات يم چا چې زمکه پېدا کړه ما بنى آدم پېدا کړل چې هلته اوسېږى. ما د خپل ‌طاقت په ذريعه آسمانونه خوارۀ کړل، او هم ما په آسمان کښې ټول ستورى جوړ کړل.

¹³ما په خپله خورس راپاڅولے دے چې اقتدار په لاس کښې واخلى او زما مقصد پوره کړى او کارونه سم کړى. زۀ به هم د هغۀ ټولې لارې سيدها کوم. هغه به زما ښار بيا جوړ کړى، او زما خلق به د قېد نه آزاد کړى. هغه به دا هر څۀ مفت کوى، نۀ به پيسې اخلې او نۀ تحفې.“ مالِک خُدائ رب‌الافواج دا وئيلى دى.

¹⁴مالِک خُدائ وائى، ”د مِصر او ايتهوپيا مال دولت به ستاسو وى، او د سبائيانو لوَړ لوَړ سړى به ستاسو غلامان وى، هغوئ به په تاسو پسې په زنځيرونو کښې روان وى. هغوئ به تاسو ته ټيټ شى او اِقرار به وکړى چې، خُدائ پاک ستاسو مل دے، صرف هغه خُدائ پاک دے. د هغۀ نه بغېر بل خُدائ نشته.“

¹⁵بې شکه تۀ هغه خُدائ يې څوک چې ځان پټ ساتى، اے د بنى اِسرائيلو خُدائ پاکه، خلاصونکيه!

¹⁶څوک چې بُتان جوړوى نو هغوئ به د شرم سره مخ شى، او هغوئ ټول به سپک شى.

¹⁷خو مالِک خُدائ د بنى اِسرائيلو مُلک بچ کوى، د يو نۀ ختميدنکې خلاصون سره. او د دې خلق به کله هم بې‌عزته نۀ شى تر هميشه پورې.

¹⁸مالِک خُدائ وائى، ”زۀ مالِک خُدائ يم، او بل يو خُدائ هم نشته. څوک چې دا وائى هغه خُدائ پاک دے! چا چې آسمانونه پېدا کړى دى، دا هغه ذات دے کوم چې زمکه پېدا کړه او جوړه يې کړه، او زمکه خوشې او شاړه پاتې نۀ شوه بلکه هغۀ دا د اوسيدلو قابله جوړه کړه. چې ژوندې مخلوق پکښې اوسيږى.

¹⁹ما څۀ په پټ ځائ کښې پټې خبرې نۀ دى. او نۀ مې بنى اِسرائيلو ته دا وئيلى دى چې، بې شکه ما لټوئ، خو تاسو به ما مومئ نه. زۀ، مالِک خُدائ يم او زۀ رښتيا وايم، او څۀ چې صحيح وى نو زۀ د هغې اعلان کوم.“

²⁰”هغه ټول خلق چې د بادشاه د زوال نه پس ژوندى پاتې يئ، راغونډ شئ، خپل ځانونه زما حضور کښې پېش کړئ! څوک چې ځان سره د لرګى بُتان ګرځوى هغوئ په هيڅ هم نۀ پوهېږى! چې کوم معبودان خلاصون نۀ شى ورکولے نو د هغوئ نه دعا ولې غواړى؟

²¹راشئ او خپله لانجه په عدالت کښې پېش کړئ، بې شکه اول د يو بل سره مشوره وکړئ. ډېر پخوا دا پېشن ګوئى چا ورکړې وه؟ ولې ما مالِک خُدائ ډيره موده مخکښې دا اعلان نۀ وو کړے؟ ځکه چې بغير زما نه بل يو خُدائ هم نشته. زۀ خلاصونکے او صادق خُدائ يم. زما نه بغير بل يو خُدائ هم نشته.

²²اے د ټولې دنيا خلقو، اوس ما ته راوګرځئ او خلاصُون حاصل کړئ! صرف زۀ خُدائ پاک يم او زما نه بغير بل يو خُدائ هم نشته.

²³زما وعده رښتيا ده، او زما وعده به نۀ بدلېږى. ما په خپل نوم باندې قسم خوړلے دے‌: چې هره يوه ګوډا به زما په وړاندې ټيټېږى او هره ژبه به قسم خورى.

²⁴او وائى به چې فتح او طاقت صرف د مالِک خُدائ په ذريعه ملاوېږى، خو هغه ټول څوک چې زما نه نفرت کوى نو هغوئ به زما حضور ته راشى او شرم سره به مخ شى.

²⁵خو د بنى اِسرائيل ټول اولاد به د مالِک خُدائ په نظر کښې صادقان شى او په هغۀ به فخر کوى.“