Read Pashto Bible (Yusufzai) — د پښتو مقدس کتاب يشعياه 46 Bible Online

يشعياه 46 - Pashto Bible (Yusufzai) — د پښتو مقدس کتاب bible

يشعياه 46

¹د بابل د معبودانو بيل او نبو سرونه ښکته وو کله چې دا راکوزولے شول، او اوس هغه په ځناورو باندې بار دى، چې د ستړى شوو ځناورو دپاره بوج دے.

²دا دواړه معبودان ټيټ شول او پړ مخې پريوتل. هغوئ د بوج جوړيدو نه بچ پاتې نۀ شول او اوس په خپله جلاوطن شول.

³”اے د يعقوب اولاده، ما ته غوږ ونيسئ، اے په بنى اِسرائيلو کښې زما باقې پاتې شوو ټولو خلقو! د مور د خيټې نه ما ستاسو پالنه کړې ده، چې کله تاسو پېدا شوى يئ نو د هغې وخت نه زۀ په تاسو پام کوم.

⁴زۀ ستاسو خُدائ پاک يم او زۀ به ستاسو ساتنه کوم چې تاسو بوډاګان او سپين سَرى هم شئ. نو ما تاسو پېدا کړى يئ او ستاسو خيال به ساتم، زۀ به ستاسو ملاتړ يم او تاسو به بچ کوم.“

⁵مالِک خُدائ وائى، ”تاسو به ما د چا سره برابروئ؟ زما په شان بل څوک شته څۀ؟

⁶خلق خپلې کڅوړې کولاو کړى او سرۀ زر ترې نه غورزوى، هغوئ په تَلو باندې سپين زر تلى. هغوئ زرګر له پېسې ورکړى چې يو بُت ورله جوړ کړى، او بيا ورته ټيټېږى او عِبادت يې کوى!

⁷هغوئ دا خپلو اُوږو ته اُوچت کړى او يو خوا او بل خوا يې وړى راوړى، او بيا په يو ځائ کښې يې کېږدى او هلته ولاړ وى، خو چې چرته وى نو د هغه ځائ نه حرکت نۀ شى کولے. که څوک دې ته په چغو فرياد وکړى، نو دا جواب نۀ ورکوى او نۀ هغه کس د مصيبت نه بچ کولے شى.

⁸اے ګناهګارانو، دا ياد ساتئ، او چې ما څۀ کړى دى هغه مۀ هېروئ.

⁹هغه راياد کړئ چې ډېره موده مخکښې شوى وُو، ځکه چې صرف زۀ خُدائ پاک يم او زما په شان بل هيڅ څوک هم نشته.

¹⁰د ابتدا نه ما د انجام پېشګوئې ورکوله، ما ډېر پخوا وئيلى دى چې څۀ کېدونکى دى. ما وئيل چې زما منصُوبې به نۀ ناکامه کېږى، او چې زۀ به هغه هر يو کار کوم چې ما يې اراده کړې وه.

¹¹زۀ د نَمر خاتۀ طرف نه يو ښکارى مارغۀ راغواړم، د لرې مُلک نه به يو داسې سړے راشى چې زما منصُوبه به پوره کوى. څۀ چې ما وئيلى دى زۀ به هغه سر ته رسوم. او چې کومه منصُوبه ما جوړه کړى وى هغه به سر ته رسوم.

¹²اے ضدى خلقو، ما ته غوږ ونيسئ څوک چې د خلاصون نه ډير لرې يئ.

¹³ما خپل خلاصون نزدې راوړے دے، هغه لرې نۀ دے. زما خلاصون راتلو کښې به وخت نۀ لږى. زۀ به يروشلم بچ کړم او بنى اِسرائيلو ته به خپل شان او شوکت وښايم.“