Read Pashto Bible (Yusufzai) — د پښتو مقدس کتاب يشعياه 50 Bible Online

يشعياه 50 - Pashto Bible (Yusufzai) — د پښتو مقدس کتاب bible

يشعياه 50

¹مالِک خُدائ وائى، ”د يهوداه خلقو راشئ، او ما ته هغه طلاق نامه وښايئ چې ما ستاسو مور له ورکړې وه، چې طلاق ورکړم. ګورئ هم ستاسو د خپلو ګناهونو له وجې ستاسو مور طلاقه شوه. يا ستاسو خيال دا دے چې ما تاسو په قرضدارى باندې خرڅ کړئ ځکه چې زۀ قرضدار وم؟ نه، تاسو هم د خپلو ګناهونو له وجې خرڅ شوئ.

²چې زۀ راغلم نو څوک هم نۀ وو، ولې؟ چې ما آواز وکړو نو چا هم جواب رانۀ کړو، ولې؟ ولې زما لاس دومره کمزورے وو څۀ چې تاسو مې خلاصولے نۀ شوئ؟ ولې زۀ دومره کمزورے يم څۀ چې تاسو بچ کولے نۀ شم؟ زما يو حُکم سره سمندر اوچ شى او سيندونه په صحرا باندې بدل شى، او بغير اوبو نه کبان مړۀ شى او هر طرفته بدبويې خوَره شى.

³هم زۀ آسمان باندې توره کپړه اچوم او هم زۀ هغې ته د غم جامې اچوم.“

⁴خُدائ تعالىٰ ما له د يو استاذ ژبه راکړې ده، د دې دپاره چې ستړو خلقو له تسلى ورکړم. هر سحر هغه ما پاڅوى او هغه زما په زړۀ کښې دا جذبه اچوى چې د هغۀ ښودنې ته غوږ ونيسم.

⁵خُدائ تعالىٰ ما ته صفا وينا کړې ده، او ما د هغۀ نه سرکشى نۀ ده کړې او نۀ د هغۀ نه اوړېدلے يم.

⁶چا چې زما وهل غوښتل ما هغوئ ته خپله ملا وړاندې کړه، چا چې زما نه ږيره ويستله ما هغوئ ته خپل مخ وړاندې کړو. ما د هغوى د بې‌عزتۍ او تُوکاڼو نه خپل مخ نۀ دے پټ کړے.

⁷خو خُدائ تعالىٰ زما مدد کوى نو زما بې‌عزتى به نۀ کيږى. ما د هغۀ د مرضۍ پوره کولو کلکه اراده کړې ده. ما ته پته ده چې زۀ به د شرم سره نۀ مخ کېږم.

⁸څوک چې ما ته صداقت ښائې هغه نِزدې دے، څوک دا جرأت کولے شى چې په ما باندې الزامونه ولګوى؟ زما مخالف چرته دے چې په ما الزام ولګوى! هغه دې رامخامخ شى.

⁹هم خُدائ تعالىٰ زما ملګرتيا کوى، نو څوک به ما مجرم ثابت کړى؟ په ما باندې ټول الزام لګوُونکى به ورک شى هغوئ به داسې ختم شى لکه چې کپړه چينجو خوړلې وى.

¹⁰په تاسو کښې څوک د مالِک خُدائ نه يريږى او د هغۀ د خِدمت کوُونکى آواز منى؟ څوک چې په تيارۀ کښې روان وى هيڅ رڼا ورسره نۀ وى خو بيا هم دې د هغۀ ايمان په مالِک خُدائ باندې وى او د هغۀ توکل دې په خُدائ پاک باندې وى.

¹¹خو تاسو باقى خلق څوک چې خپل ځانونه بَلو غشو سره وسلحه بند کړئ، نو هم د خپل اور د شغلو په رڼا کښې لاړ شئ! زما د لاس نه به تاسو ته هم دا اجر ملاويږى، تاسو به سخت درد کښې راپريوځئ.