Read Pashto Bible (Yusufzai) — د پښتو مقدس کتاب يشعياه 61 Bible Online

يشعياه 61 - Pashto Bible (Yusufzai) — د پښتو مقدس کتاب bible

يشعياه 61

¹د خُدائ تعالىٰ روح په ما نازل دے ځکه چې زۀ هغۀ مسح کړے يم، او دې له يې را ليږلې يم چې غريبانانو ته زيرے ورکړم، مات شوې زړونه روغ کړم، او غلامانو ته آزادئ ورکړم او قيديانو ته د خلاصون اعلان وکړم.

²د مالِک خُدائ د برکت نه ډک کال راغلے دے، او د خُدائ پاک د بدل اخستلو ورځ ده. او ټولو ماتم کونکو ته به تسلى مِلاو شى،

³څوک چې په صِيون کښې ماتم کوى نو هغوئ له به د ايرو په ځائ ښائسته تاج ورکړم، او د غم په ځائ به خوشحالى ورکړم، او د پرېشانۍ په ځائ به حمد‌و‌ثناء ورکړم. هغوئ به په خپل صداقت کښې د څېړۍ د داسې ونو په شان وى چې مالِک خُدائ په خپله د خپل جلال دپاره کَرلى وى.

⁴هغوئ به پخوانى کنډرات بيا آباد کړى او د هغه ځايونو مرمت به وکړى کوم چې ډيره موده مخکښې تباه شوى وو. هغوئ به هغه تباه شوى ښارونه بيا قائم کړى کوم چې تر ډيرو نسلونو پورې غير آباد وُو.

⁵د نورو مُلکونو خلق به ستاسو خِدمت کوى. هغوئ به ستاسو د رَمو خيال ساتى، ستاسو پټو کښې به ايوه کوى او ستاسو د انګورو د باغونو خيال به ساتى.

⁶په هغه وخت به تاسو د ماِلک خُدائ اِمامان ياديږئ، او خلق به تاسو ته د خُدائ پاک خادمان وائى. تاسو به د نورو قومونو د مال دولت نه خوند واخلئ او د هغوئ نه چې کول مال حال تاسو ته ملاويږې په هغې به لافې وهئ.

⁷د بې‌عزتۍ او سپکاوى په ځائ به تاسو ته يو په دوه عزت درکړے شى. په خپل مُلک کښې به تاسو د مال دولت يو په دوه حصه دار يئ، او ستاسو خوشحالى به د همېشه دپاره وى.

⁸مالِک خُدائ وائى، ”زۀ د اِنصاف سره مينه کوم او زۀ د غلا او بدۍ نه نفرت کوم. زۀ به وفادارۍ سره خپلو خلقو له د هغوئ اجر ورکړم او د هغوئ سره به د همېشه دپاره يو تړون وکړم.

⁹د هغوئ نسل به په قومونو کښې او د هغوئ اولاد به په اُمتونو کښې مشهُور شى، هر څوک چې هغوئ وګورى نو پته به ورته لږى چې دا هغه خلق دى چا له چې مالِک خُدائ برکت ورکړے دے.“

¹⁰زۀ په مالِک خُدائ کښې ډير خوشحاله يم. زما ځان د خُدائ پاک په تعريف کښې د خوشحالۍ سندرې وائى. ځکه لکه څنګه چې د وادۀ ځلمے د وادۀ په جوړه کښې او ناوې په کالو ځان ښائسته کړے وى داسې مالِک خُدائ زۀ د خلاصون په لباس او د صداقت په څادر کښې رانغښتے يم.

¹¹لکه څنګه چې زمکه شينکے راټوکوى او باغ خپل تخم زرغونوى، نو داسې به خُدائ تعالىٰ خلق صداقت ته جوړ کړى او دوئ به د ټولو قومونو په مخکښې د هغۀ ثناء او صِفت وکړى.