Read Pashto Bible (Yusufzai) — د پښتو مقدس کتاب يشعياه 63 Bible Online

يشعياه 63 - Pashto Bible (Yusufzai) — د پښتو مقدس کتاب bible

يشعياه 63

¹دا څوک دے چې د ادوم نه راروان دے، سرې جامې يې اغوستې دى او د بصرا ښار نه راروان دے؟ دا څوک دے چا چې د رُعب شاهى لباس اغوستے دے او قُوت سره روان دے؟ ”هم زۀ يم، چې د صداقت اعلان کوم، او د بچ کولو طاقت لرم.“

²ستا جامې ولې دومره سرې دى؟ داسې لکه چې ستا جامې د انګورو نچوړولو سره سرې شوې وى.

³”ما يواځې انګور نچوړ کړى دى، په قُومونو کښې هيڅ څوک هم زما سره نۀ وو. ما په غصه کښې هغوئ نچوړ کړى دى او د قهر نه پرې ګرځيدلے يم. د هغوئ د وينې دارې زما په کپړو پريوتې دى او زما جامې په وينو سرې شوې دى.

⁴ځکه چې هغه وخت راغلے دے چې د خپلو خلقو دپاره بدل واخلم. او هغه کال راغلے دے چې هغوئ په بيعه واخلم.

⁵زۀ حېران شوم چې هيڅوک نۀ وو چې خلاصے يې کړے وے او د مظلومانو مدد يې کړے وے. نو زۀ پخپله وروړاندې شوم چې هغوئ د خپل مضبوط لاس سره بچ کړم. او زما غصې زما مدد وکړو.

⁶ما په خپله غصه کښې قومونه چخڼى او نشه کړل او د هغوئ وينه مې په زمکه توئ کړه.“

⁷زۀ به د مالِک خُدائ د نۀ ختمېدونکې مينې بيان وکړم، هر څۀ چې هغۀ زمونږ دپاره کړى دى نو د هغې دپاره به زۀ د هغۀ ثناء صِفت کوم. هغۀ چې بنى اِسرائيلو سره بې شميره ښيګړې کړى دى په هغې به خوشحالى کوم، کومې چې هغۀ د خپل رحم او مينې په مطابق کړى دى.

⁸هغۀ ووئيل، ”دوئ زما خپل خلق دى، يقيناً چې هغوئ به زما سره دوکه نۀ کوى.“ او هغه د هغوئ خلاصونکے جوړ شو.

⁹هغه د هغوئ په ټولو تکليفُونو کښې شريک شو. او هغوئ هغه فرِښتې بچ کړل کومه چې د خُدائ پاک د حضُور نه ورغلې وه. د خپلې مينې او زړۀ سواندې له وجې يې هغوئ په بيعه واخستل، او ټوله پخوانۍ زمانه کښې يې هغوئ اوچت کړى وُو او ګرځول يې.

¹⁰خو هغوئ د هغۀ خِلاف سرکشى وکړه او د هغۀ مقدس روح يې خفه کړو. نو مالِک خُدائ د هغوئ دشمن شو او د هغوئ خِلاف يې جنګ وکړو.

¹¹بيا هغوئ ته هغه تېره زمانه راياده شوه کله چې موسىٰ د خپلو خلقو د مصر نه راوتو کښې رهنمائې کوله. هغوئ چغه کړه، ”هغه چرته دے چا چې بنى اِسرائيل د سمندر نه پورې ويستل، چې موسىٰ د هغوئ شپون وو؟ هغه چرته دے چا چې خپل مقدس روح راولېږلو چې د هغۀ د خلقو په مينځ کښې وى؟

¹²هغه چرته دے چا چې خپل طاقت څرګند کړو کله چې موسىٰ خپل لاس اوچت کړو، هغه چرته دے چا چې د هغوئ په وړانداې سمندر تقسيم کړو او خپل ځان يې د همېشه دپاره مشهُور کړو؟

¹³هغه چرته دے چا چې د سمندر بيخ کښې د دوئ تيرويدو کښې رهنمائى وکړه؟“ هغوئ لکه د ښُو اسونو په شان وُو چې په صحرا کښې تېز روان وُو او هيڅ تيندکونه يې نۀ خوړل.

¹⁴لکه څنګه چې څاروى د آرام وادۍ ته کوزيږى، داسې د مالِک خُدائ روح هغوئ له آرام ورکړو. مالِک خُدائ خپل خلق بوتلل او د هغۀ د نوم درناوے وشو.

¹⁵اے مالِکه خُدايه، د آسمان نه په مونږ باندې نظر وکړه، چرته چې تۀ د پاکوالى او جلال سره اوسېږې. ستا غېرت او ستا طاقت چرته دے؟ مونږ ستا د رحم او همدردۍ نه محروم پاتې شو.

¹⁶هم تۀ زمونږه پلار يې. اګر که اِبراهيم او يعقوب مونږ خپل نۀ ګڼى، خو بيا هم مالِکه خُدايه، هم تۀ زمونږه پلار يې، د پخوا نه تۀ زمونږ بچ کونکے يې.

¹⁷اے مالِکه خدايه! تا ولې مونږ دې ته مجبور کړو چې ستا لارې نه واوړُو؟ او زمونږ زړونه دې ولې دومره سخت کړل چې ستا نه نۀ يريږوُ؟ د خپلو خِدمت کوُونکو د خاطره راوګرځه د هغه قبيلو د خاطره چې ستا ميراث دے.

¹⁸ستا مقدس ځائ د لږ وخت دپاره ستا مقدسو خلقو سره وو، خو اوس زمونږ دشمنانو هغه تباه کړے دے.

¹⁹کله کله خو داسې ښکارى لکه چې مونږ هډو ستا خلق نۀ وُو او نۀ کله ستا د خلقو په نوم ياد شوى يُو.